علي أوحافي
عيش نهار تسمع خبار. السفير الأميركي في الرباط، صامويل كابلان، يا إما كيضحك على المغاربة، يا إما كيضحك على راسوـ، وغالبا الأولى هي اللي صحيحة. كيفاش؟
الرجل، في حديث إلى أسبوعية “تيل كيل”، فسر لقاء كاتبة الدولة في الخارجية، مادام هيلاري كلينتون بالمستشار الملكي الطيب الفاسي الفهري، قبل لقائها بوزير الشؤون الخارجية والتعاون سعد الدين العثماني، بأن مكتب الفهري جاها قريب.
اللي سمع هاد التفسير غادي يجيب ليه الله باللي هيلاري كلينتون خرجات من أوطيل سوفيتيل فالرباط ووقفات فالرومبوان وشيرات على طاكسي أحمر، وقالت ليه الله يرحم الواليدين دوزني عند السي الفاسي الفهري وتسناني نسالي معاه باش تديني عند العثماني راه ما عنديش الصرف بزاف.
الحاصول يا السي كابلان، الله يعطينا يور فايس وخلاص.