محمد محلا
موليم العروسي، كاتب مغربي، معروف عنه حسه المرهف في الكتابات وحتى في الفايس بوك، إذ نشر أخيرا صورة له يقبل زوجته، في رد فعل على موقف عبد العزيز أفتاتي، الذي خلق ضجة على متن طائرة بسبب قبلة في فيلم.
موليم، في دردشة في برنامج “كيفاش” على ميد راديو، اليوم الجمعة (1 فبراير)، كشف أنه لا يعرف أفتاتي، وأن القبلة التي نشر صورتها عادية، وقال: “البوسة ماشي حشومة.. والله يخرج بوسة ديالنا وديالك على خير”.
كتعرف سبايدر مان أي الرجل العنكبوت؟
(يضحك) كنعرفو كيفما كيعرفو الأطفال والكبار.
راه من غير أنه بطل وكينقد الناس ملي كيسقطو الطائرات، هو واحد الإنسان رومانسي، وبينكما قواسم مشتركة هي القبل وأفتاتي!!
شكون أفتاتي؟ صراحة ما كنعرفوش شخصا، ولكن كنعرف أنه كاين عدد ديال الناس فيهم شوية ديال الشطحات الغريبة وهادي وحدة منها.
عبد العزيز أفتاتي، النائب عن حزب العدالة والتنمية، قالو كان غادي يسقط طائرة بسبب قبلة وأنت أسقطت الطابو بقبلة.. كيفاش هاد القضية؟
هاد القبلة راها مشكل كبيرة، كانت غادي تسقط طائرة ولكن ربما حنا تسقطنا في فخاخ ستكون لا قبل لنا بها، غدا يمكن ليك أنت تكون ماشي في الشارع وفي حالة عادية من الحنان تقترب من صديقتك وتقبلها وغادي يوليو عندك مشاكل، وهادي مسألة عرضت في رقعة ضيقة ووقع هاد المشكل كلو، فما بالك بالمجتمع.
ولكن هاد الشي ماشي شوية حشومة؟
حشومة أن الواحد يبوس السيدة مع من عايش؟
(مقاطع) أييه، ويحط صورة للقبلة على فايس بوك.
كيفاش حشومة، فايس بوك عامر بالقبل، غير المسألة الي وقعت هو أن هناك هجمة ظلامية وقعت على بوسة، هو موقف يمكن نديرو أنا ويمكن يديروه بزاف ديال الناس، ويدوز بهدوء.
ملي كنقولو قبلة كتدوز خفيفة، ولكن يلا قلنا بوسة راه صعيبة شوية، أو لا؟
حنا ما قلناش بوسة، بوسة قالتها الصحافة، حنا قلنا قبلة، وما مشيناش بعيد لحد البوسان، حيت خاص نفرقو بين بوسة الحنان والبوسة الشبقية.
شنو الرسالة اللي بغيتي توصل من هاد القبلة، من غير رسالة الحب للزوجة ديالك؟
بغيت نوصل رسالة الحب، وراسلة يا أيها الناس اسمعوا وعوا، راه في يوم من الأيام راه غادي يتمنع علينا حتى في الفضاءات العمومية أننا نبرهنو فيها على الحنان ديالنا والحب ديالنا للناس اللي قراب لينا، بل أكثر من هادا سيمنع علينا ويضيق علينا الخناق حتى في الأعمال الفنية.
السي موليم الله يخرج بوستك على خير.
الله يخرج بوسة ديالنا وديالك على خير (يضحك).
