ضحايا كلاشات “البيغ” ما زال كيخرجو واحد بواحد باش يجاوبوه. البارح الاثنين (24 دجنبر)، “حليوة” طلق كليب بعنوان “57 كج” اللي كان رد مباشر على أغنية “170 كج” ديال “البيغ”.
بلا “أوتو تيون”
“حليوة” هضر على “مسلم” اللي كان قال باللي ما كيعرفش شي رابور سميتو حليوة، ودار إشارة لصاحبو “طوطو” باسم “التراك” ديالو “بيكولو”. ومن بعد بدا “حليوة” كينتاقد “البيغ”، وقاليه باللي ما سجلش مباشرة، واستعمل “أوتوتيون” باش يحسن الصوت ديالو.
وزاد قال ليه أنه ما بقاش مسوق لهاد الشي ديال لكلاش من مدة طويلة، وخاصة من بعد فاش دوز سهرة في فرنسا.
دعم الدولة و22 سنة
حليوة هاجم المسيرة ديال “البيغ”، وقال ليه باللي هو استفد من دعم الدولة باش يدير بعض الأعمال الفنية، وفكرو باللي هو دابا عندو 22 سنة وعندو مسيرة حافلة فالراب، وهو العمر اللي كان فيه “البيغ” ما زال كيقرا وما عارفو حتى واحد كرابّور.
البخل والكريدي
وبنفس طريقة “البيغ”، حليوة دخل للأمور الشخصية ديال، وقال ليه باللي توفيق حازب مازال كيخلص الكريدي ديال الدار والاستوديو، وفكرو باللي ما كانش مهلي فالدراري اللي خدمو عندو وما كيخلصهمش.
الرجال بالرجال
وكان واضح باللي “حليوة” ما عجبوش يكلاشيه “البيغ” عن طريق “بنت الستاتي”، وقاليه بطريقة غير مباشرة خليك كتهضر معايا أنا، ويلا بغيتي تجبد “بنت ستاتي” راه مراتك اللي كتعرفها.
الجوانات والسترينغ وبيغ ماك
“حليوة” دافع على راسو من بعد النعت ديال الجوانات اللي كلاشاه بيه “البيغ”، وقال باللي الواحد يتعرف بالجوانات أحسن ما يلبس سترينغ، وشبه “البيغ” فالكليب بسندويتش “بيغ ماك”، في إشارة منو باللي غادي ياكلو فهاد “التراك”.
