بقلم: نجيكم نيشان
شي باغي يدخل للحكومة وشي ما باغيش، مّالين المقاعد القليلة كيتحكمو في التشكيلة ومول أكثر المقاعد ما لاقيش الحل وما لاقيش بديل، وزيد وزيد، هاد الشي كامل كيحيلنا لدوك المقابلات اللي كيتلعبو في الدروبا.
الماتش كيبدا وما كنعرفوش إمتى غادي يسالي. علاش زعما ما تكونش مدة محددة لتشكيل الحكومة؟ صافي غير الحكم يقول بداو واللعابة يبقاو يجريو ويجاريو حتى يسخفو وملي يجيو يشوفو يلقاو راسهم لعبو 4 ساعات ولا 4 أشهر؟
والأكثر من هذا حتى الملعب ما كيطراسيوهش، غير اللي عندو شي ركابي يجري، ما كاين توش ما كاين كورنير ما كاين تسلل. سير أنت كاع دور على الشبكة ورجع ماركي، حتى الالتفاف زوين.
ومول البالون ملي ما كيخليوهش يلعب على خاطرو كيهز كورتو ويغضب ليهم، ويمشي يعتكف في دارو، حتى يجيو يبداو يزاوكو فيه: “ها العار يلا ما هبط راه نخليوك تماركي”.
هاد الشي ديال تشكيل حكومة خاصو شي قانون تنظيمي، باش اللي شد السوارت يعرف راسو آش تابعو، وشحال ديال الوقت خاصو يلعب فيها، راه مصير بلاد وعباد اللي كضعيع بهاد البلوكاج.
