بقلم: نجيكم نيشان
الفرق بينا وبين الميريكان كاين في كلشي حتى في علاقة الزعماء فيما بينهم.
مباشرة بعد إعلان نتائج الانتخابات الرئاسية الأمريكية هيلاري كلينتون اتصلت بمنافسها الفائز بالكرسي ديال البيت الأبيض، دونالد ترامب، وهنأته بالفوز في الانتخابات.
الراجل حتى هو طلع ولد الناس وفي خطاب الفوز شكر كلينتون على كل المجهودات اللي قامت بها من أجل البلاد، واخا دوزو حملة انتخابية سخونة.
في النسخة المغربية، حتى بعد الانتخابات تبادل عبد الإله ابن كيران، الأمين العام لحزب العدالة والتنمية، وإلياس العماري، الأمين العام لحزب الأصالة والمعاصرة، السبان والمعيور والهمز واللمز وبقى خاصم غير المناتفة.
الأكثر من هذا، فبعد 30 يوم من فوز حزب العدالة والتنمية بالانتخابات عاد ناض العماري يهنئ ابن كيران. مول التراكتور اتصل بمول اللامبة، أول أمس الاثنين (7 نونبر)، وبارك ليه، غير هوما ما بغاوش يعاودو لينا آش دار بينهم.
حتى القطبية ديالنا ما بحالها قطبية في العالم كامل، وحنا راه ديما حالة خاصة.
