خوتي المغاربة السلام عليكم. هاد الأيام غبرت عليكم شوية، ما ديروهاش مني قلة الصواب، وما تقولوش راني خايف ولا حشمان و لا ما بقيت لاقي ما نقول. أنا غير كنت مشغول شوية وصافي. كيف كتعرفو كنت مشيت للقاهرة، وملي رجعت لقيت اجتماع ديال الأمانة العامة، وفوق من هاد الشي باقي نفكر كيفاش ندير مع داك شباط حيتاش طير علي النعاس.
أنا عارف باللي هاد الشي ديال صندوق المقاصة مشوش ليكم البال، ولكن ما غاديش نهضر على هاد الموضوع اليوم. غادي يجي النهار اللي نقول فيه كلشي. أنا اليوم باغي نرد على هادوك اللي كيقولو باللي الشعبية ديالي ما بقاتش. آي هااااي، والله ما عارفين شي حاجة. الحمد لله فين ما مشيت الناس حاضييني، من الكرافاطة حتى لفهمتيني ولالا، والحساد ديالي يموتو بالسم.
أنا كاع ناوي نشوف مع السي مصطفى الخلفي، الوزير ديال الاتصال، باش يهضر مع الناس ديال الجزيرة الرياضية نعطيوهم احتكار ديال نقل الجلسات الشهرية، بحال يلا كينقلو كأس إفريقيا ولا كأس العالم.
غادي تقولو لي آش جاب هاد الشي للرياضة، الجواب بسيط: راه داك الشي اللي كنديرو فالبرلمان بحال شي ماتش، وباش نتقنو اللعبة غادي نبقاو نلبسو التونيات. وبهاد الطريقة ندخلو الفلوس ونفرجو عباد الله.
فهمتوني ولالا؟
