قرر اللاعب السابق لفريق اتحاد طنجة، أسامة الغريب، وضع ملف ترشحه لرئاسة “فارس البوغاز”، خلفا للرئيس عبد الحميد أبرشان الذي قدم استقالته، أول أمس الثلاثاء (12 أكتوبر)، بسبب تراكم المشاكل وتفاقم الأزمة المالية التي يعيشها الفريق الطانجاوي منذ الموسم المنصرم.
وفي اتصال هاتفي مع موقع “كيفاش” عبر اللاعب عن طموحه ورغبته في رئاسة فريق اتحاد طنجة وخروجه من الأزمة الخانقة التي يتخبط بها منذ الموسم الماضي.
الغريب: طموحي نولي رئيس اتحاد طنجة
وقال الغريب “أنا من ديما كان الطموح ديالي هو نكون واحد النهار رئيس ديال اتحاد طنجة ودابا جات الفرصة باش نوضع الملف ديالي”.
وتابع “الحمد لله فجنبي رجال اللي دعموني وقالو ليا حنا فجنبك غادي ندعموك ونعاونوك وهادو مستثمرين قويين… حنا ما بغيناش ندخلو بالشكارة والفلوس حنا بغينا شي حاجة اللي ندخلو ليها مقننة اللي هي هاد الناس اللي عندهم شركات يساعدونا ويكونو هما المستشهرين ديالنا يعني العلامة التجارية ديالهم تكون عندنا فافريق هذا هو همنا”، مضيفا “ماشي همنا هو نجمعو الفلوس من عند الناس باش ندخلو نسيرو الفريق واحد 8 شهور ولا 9 شهور ومن بعد نقولو را الفلوس تسالاو… ولكن همنا حاليا هو خاص يكونو عندنا موارد قارة باش ندخلو نسيرو بها”.
وأكد الغريب أن هناك بعض الجهات “كيقولو ليا حنا نعاونوك ماديا ولكن حنا ما بغيناش اللي يعاونا ماديا حنا بغينا الناس تعاونا بالإشهار ديالها حنا بغينا الدعم القانوني ما بغيناش داك التسيير العشوائي ديال خود الفلوس ودخل تسير”.
أزمة السيولة المالية
وواصل الغريب حديثه قائلا “الإحساس ديالي كإحساس أي لعاب فالمغرب ولا العالم هو أنه يكون كيخدم ويحس براسو بحال يلا كيخدم فشركة كاين واحد النظام كاين نظام فالأجور وفالتوقيت يلا قلت لشي لعاب أنا كنواعدك غادي نعطيك الأجرة فهاد التاريخ خاصني نعطيها ليه فوقتها وهادو هما الحاجات اللي كيبغيو اللاعبين”.
وختم الدولي المغربي تصريحه “كنتمنى نديرو اليد فاليد مع ناس المدينة ونطورو من الفريق ديالنا ويكون كينافس منافسة قوية فالبطولة الوطنية ولما لا ينافس فإفريقيا وهاد الشي كلو كيجي بالنظام… والظروف اللي كيعيشها فريق اتحاد طنجة هو أننا خاصنا نوفرو السيولة المالية وهاد الشي علاش قلت خاصنا نكونو على ضمانات باش ندخلو نعتقو الموقف واللاعبين اللي عندهم بزاف دالكريديات وكنتمنى أننا نكونو قد المسؤولية يلا تعطاتنا”.
وكان أسامة الغريب، المزداد سنة 1987، واحدا من صناع الإنجاز الذي حققه المنتخب الوطني سنة 2012، بفوزه بكأس العرب في السعودية.
وتألق المدافع الأيسر أيضا على مستوى الأندية، حيث لعب للوداد الذي فاز معه بلقب البطولة الوطنية الاحترافية، وتوج مع الفتح بكأسي الكونفيدرالية والعرش، وحصد الدوري مع اتحاد طنجة، ويواصل مشواره حاليا مع النادي القنيطري.
