واخا جا الصيف والفيديوهات قلالو، وولّى غير التعاويد ديال داك الشي اللي داز فالعام، كاين شي فيديوهات دارو البوز وطلعو فالطوندوس ديال السيمانة فاليوتوب.
كيم كاردشيان ديال المغرب، اللي صورتها زعزعات مشاعر سكان الفايس بوك، وقالو عليها بأن المغرب فيه الزين وداك الشي، بقاو يقلبو حتى لقاو الفيديو ديالها وهي كتفتتح مدرستها. الفيديو تبارطاجا بزاف فالفايس بوك وطالع فالمراكز الأولى فاليوتوب.
عائشة تاشنويت، اللي بدلات اللوك وجات بوكوصة، دارت مليون فالسيمانة بفضل الأغنية ديالها اللي بغات تفهم الناس العربية.
الفيديو، اللي جا فالمركز الثاني فاليوتوب، هو ديال اعتداء ديال شي دراري على بنت فطنجة. الفيديو اللي خلق ضجة، وخلّى البوليس يخرج ويقول “واك واك أعباد الله راه ما كانش اعتداء”.
مغني الراب دون بيغ خرج الجديد ودار فيديو كليب فيه الميخيات، والبطل ديالو طارو ديال الزبل كيدوي فيه مع الإعلامي رشيد الإدريسي وكيشرح ليه المعاناة ديالو فالدار الكحلة، وما نساش صاحبو جواد اللي هو الطوبيس اللي كيعاني من الزحام والشفرة وتهراس الزاج.