جمال الرياضي
رشيد الطاوسي ما غاديش يكون فكرسي احتياط المنتخب الوطني في المباراة الودية ضد اسكتلندا المبرمجة في الشهر اللي جاي فأكادير. العقد ديال الطاوسي مع الجامعة غادي يسالي رسميا نهار 30 من الشهر الحالي، وتكليفه بقيادة المنتخب أمام اسكتلندا غادي يكون، حسب مصدر جامعي، بمثابة تمديد ضمني للعقد المنتهي. وباش ما تدخلش الجامعة فهاذ المتاهة، قلبات على واحد السيد نسيناه. واحد المدرب كياخد أكثر من 100 مليون سنتيم رغم أنه عاطل وما كيدير والو من نهار تقصى المنتخب الوطني من أولمبياد لندن في العالم اللي داز.
الجامعة اتصلت، حسب مصدر «كيفاش»، بفيربيك وطلبت منه أنه يشرف على تحضير المنتخب للمباراة ضد اسكتلندا في انتظار تشكيل الجامعة الجديدة اللي غادي تسحم في مصير مدرب المنتخب الوطني.