أكد الفنان فضيل أنه يحمل الجنسية المغربية، وبأنه استقر في المغرب منذ سنة 2013، وتحديدا في مدينة مراكش، التي حل بها قدما من فرنسا.
وأشار فضيل، خلال استضافته في برنامج “بدون لغة خشب” على إذاعة “ميد راديو”، إلى أنه ولد في فرنسا وأصوله جزائرية ويحمل الجنسية المغربية، موردا: “أنا مغربي القلب من كان فعمري 10 سنين”.
وقال الفنان فضيل: “عندي لاكارط ناسيونال مغربية ساني فيها عبد اللطيف حموشي، وكنمشي للمقاطعة وكنشم الطاجين ديال المخازنية، وعندي بيرمي مغربي، وبيرمي فرنسي، وعندي بطاقة الفنان مغربية، وعندي باسبور جزائري، وعائلتي ساكنين فتلمسان، وجدتي كانت كتغني الأمداح، داك الشي علاش تطوان تقاليدها كيفكروني بتلمسان”.
وتحدث فضيل خلال اللقاء الإذاعي عن الهجوم الذي تعرض له قبل سنوات من قبل بعض وسائل الإعلام الجزائري، بسبب تعبيره عن حبه للمغرب وللعاهل المغربي، وقال متحدثا: “الملك سيدنا وما كنقولهاش حيت كنتسنى منو شي حاجة، أنا كنعرف سيدنا ملي كان سميت سيدي، وكنعرف دار المخزن، وكنعرف الشرفة كلهم.
وتابع: “أنا الوحيد اللي خديت الجنسية المغربية بظهير، ولكن بعض المحررين ديال الإعلام الجزائري ما عجبهمش الحال… راه هاداك ملك والتعامل مع الملوك كيكون هاكاك نركعو ليه، ونهار أي واحد يتلاقى سيدنا راه غيدير نفس الشي”.
وأضاف فضيل مدافعا على حقه في الحصول على الجنسية المغربية: “أنا قلت فين هو المشكل أنني ناخد جنسية بلد إسلامي اللي هو المغرب، هاد البلاد عاونات الجزائر، وهادا شعب شقيق”، مسترسلا: “أنا فرنسي جزائري ومغربي مية فالمية… وواليديا ما عندهمش جنسية فرنسية، بابا كان مشى لفرنسا باش يخدم من ورى الاستقلال دالجزائر، بابا كيعرضو عليه الجنسية الفرنسية كيقوليهم لا وماما نفس الشي”.
ونفى ضيف رضوان الرمضاني أن يكون حصوله على الجنسية المغربية استفز الجزائريين، قائلا: “لا ما ستفزيتش الجزائريين، أنا تولدت وتربيت ففرنسا، أنا غير فنان علاش نستفزوهم؟، وعلاش يديرو لينا قرون ديال السياسة؟”.
كما نفى أن يكون حصوله على الجنسية المغربية طمعا في امتياز ما، موردا: “أنا ما عندي لا گريما ولا صالير، بالعكس أنا كنخلص هاد الشي غالي بزاف، لأنني صادق وكنقول الصراحة، وكنجي نيشان… أنا الجنسية المغربية كنحترمها وما عمري ندمت حيت خديتها، كانوا بزاف د الفنانين خداوها من بينهم أحمد وهبي اللي غنى “وهران رحتي خسارة”، واللي كان عاش أعوام فكازا مع بلخياط”.
وعن ما قدمه له المغرب، قال فضيل: “المغرب عطاني بزاف، من التسعينات وأنا كنخدم هنا فالمغرب، عطاوني ناكل ونخدم حفلات، وأنا ماشي الجزائري الوحيد اللي المغرب عطاه ياكل، وما يمكنش ندفلو فالطعام”.
