محمد المبارك
بعد قرابة أسبوع على بداية العرس الكروي في روسيا، المغاربة كان الحضور ديالهم بعشرات الآلاف، ولأن الشعب المغربي شعب النكتة والقلب الأبيض، وقعات بزاف ديال اللقطات المضحكة والطرائف اللي غادي تبقى في تاريخ المغاربة كذكريات جميلة بغض النظر على كيف كنشوفوها دابا.
المغاربة والجميلات الروسيات
أول حاجة دارتها مجموعة من الشباب من المشجعين هي أخذ صور سيلفي مع جميلات روسيات، وكاين اللي طلب منهم قبلة تذكارية، الشيء اللي بين الطيبوبة والعفوية ديال المغاربة، واللي خلى روسيات يلبيو الطلب ديالهم، وهاد الصور غادي تبقى خالدة في ذاكرة كأس العالم في روسيا.
الحمقى المشاهير
كانت بادرة جميلة أننا نشوفو زوج من الناس اللي كيخلقو جو من الهزل والسخرية في روسيا، الأول كان نيبا المراكشي اللي حتى هو استغل الفرصة وتصور مع الجميلات الروسيات، ودار لقطة طريفة من داخل الملعب فاش شد أربعة مقاعد، ونعس فوق الكراسي على المدرجات.
والشخصية الأخرى كان باطمان الرجاوي، اللي التحق بالجماهير واللي كيواعد أنه غادي يلبس اللبسة ديالو ويبان في الملعب كيف كيدير فالمغرب.
مغربية مصدومة بعد إضاعة الفرصة
التقطت عدسة مصور “بي ان سبور” مشجعة مغربية، وهي تصرخ بعد تضييع أحد اللاعبين فرصة هدف، صورة طريفة جدا، ستبقى عالقة في الأذهان خاصة أن كأس العالم مجمع الجمال.
أول روسيين تزوجو بتانكافت
فاش كان بعض الجمهور المغربي كيكتشف بعض المعالم التاريخية في روسيا، لقاو كوبل عاد خرجو من الكنيسة، ودارو ليه الاحتفال على الطريقة المغربية بالزغاريد والصلاة والسلام، يعني “تنكافت” على أصولها.
حجة وزيارة
شباب مشاو لروسيا وخداو معاهم تونيات من المغرب وبداو كيبيعهم، ولكن الواعرة هي دارو فراشة وسط الطريق، باش يدخلو للتاريخ كأول فراشة مغاربة في روسيا.
