أزال الناخب الوطني وليد الركراكي، اليوم الخميس (9 نونبر)، الستار عن القائمة المستدعاة لدخول التجمع الإعدادي الذي ستخوضه النخبة الوطنية بداية من يوم الاثنين (13 نونبر)، استعدادا للاستحقاقات المقبلة.
وقال المحلل الرياضي ابراهيم الزوين، في تصريح لموقع “كيفاش”، إنه “ما كاينش وجوه جديدة وما كاينش تغيير كبير على مستوى التركيبة البشرية فالائحة اللي كشف عليها وليد الركراكي اليوم”.
وأضاف “فقط كاين اللاعب ديوب مهاجم نيس الفرنسي واللي تحدث عليه الركراكي واللي غادي يكون ربح كبير للكرة الوطنية، ولعب لجميع الفئات السنية ديال فرنسا، والآن تمت الدعوة ديالو وفرحان بحمل قميص المنتخب الوطني”.
وأشار المحلل ابراهيم الزوين إلى إن اللائحة عرفت غياب حارس مرمى الوداد الرياضي يوسف المطيع، قائلا “غياب حارس مرمى الوداد المطيع اللي شفناه فاللائحة السابقة والآن يغيب عن هاد اللائحة، لآن المدرب اكتفى فقط ب3 حراس مرمى بتواجد المهدي بنعبيد”.
بالنسبة للدوري الاحترافي، قال الزوين “كاين بنعبيد من الجيش الملكي و3 لاعبين اللي كلهم من فريق الوداد البيضاوي، العملود كيتواجد للمرة الثانية، وكاين عطية الله اللي المكانة ديالو فالمنتخب أصبحت شبه محجوزة”، موضحا أن “غياب العزوزي حتم على المدرب أنه يحضر جبران”.
وتابع المحلل الرياضي “حنا دابا كنتسناو الموقف الرسمي لاتحاد إريتريا، واش غادي ينساحبو من المسابقة ولا لا باش نعرفو واش غتكون المباراة، ولكن عموما كتبقى نفس الأسماء نفس الوجوه اللي دائما كتكون حاضرة مع المنتخب، إلا الأسماء اللي كتغيبها الإصابة وبالتالي كيتم تغيير واحد ولا 2 ديال الأسماء في كل لائحة اللي كتوجه ليها الدعوة”.
