إسماعيل بوزار
من بعد سعيد ولد الحوات جا الدور على سعد لمجرد ولبارح جات النوبة ديال سعيد الصنهاجي. كلهم نفس “المونتيف”، غير كل واحد فين دارها وكيفاش دارها. كيفاش؟
في 2014، حصل سعيد ولد الحوات وقال ليهم غير البنت طيحات عليا تهمة، ضرب شي يامات في الحبس وخرج براءة.
في 2016 في شهر أكتوبر نزل واحد الخبر حتى واحد كان متوقعو، واللي بسببو شوهتنا وصلت للعالمية، بعد ما سعد المجرد وصلة بفنو للعالمية.
سعد لمجرد قال حتى هو غير دارو ليه مؤامرة في فرنسا من بعد لصقو ليه تهمة ديال الاغتصاب.
البارح (الأربعاء 9 نونبر)، تفجرات فضيحة أخرى، بطلها سعيد الصنهاجي، اللي بان في فيديو كيقول: “وا قلت ليا مرتي دير اللي بغيتي غا اليوم”، ولكن دار كثر من داك الشي اللي قالت ليه مرتو. الصنهاجي كان بايت مقصر مع شي بنات وصوره بالفيديو، وحتى هو لقا ليها تخريجة، قال ليك يا سيدي المافيا اللي دارو ليه الفخ، وهاد الشي وقع في 2012.
رغم ذلك رواد فايس بوك ساخطين من هاد الشي اللي وقع، وكيسخرو من كل واحد سميّتو سعد وسعيد.