محمد المبارك
على امتداد 2017، بزاف ديال الهاشتاغات والحملات كانت على الفايس بوك، واللي عطات نتائج.
من حقي نقرا..
حملة بداها محمود عبابو اللي ما قدرش يرجع يقرا حيث عندو باك قديم. حملة انتشرت على نطاق واسع ووصلات حتى للبرلمان، ومن بعد قرروا يديرو بعض التعديلات.
شهيدات القفة..
هاشتاج غزا الفايس إثر حادثة سيدي بوعلام تضامنا مع أرواح الضحايا اللي ماتو، واللي وصل عددهم 15.
كلنا ناصر.. الحرية للمعتقلين..
هادو كانوا أبرز هاشتاجات واكبوا “حراك الريف” واللي كانوا وسيلة للتعبير عن مساندة المعتقلين في إطار النضال الفايسبوكي.
الحرية لعهد التميمي..
بعد صفعها لجندي إسرائيلي، وإلقاء القبض عليها، مغاربة الفايس تضامنوا مع المراهقة الفلسطينية ودارو تصاورها فالبروفيلات ديالهم.
القدس عاصمة فلسطين..
بعد قرار دونالد ترامب حول القدس، مغاربة الفايس ناضلوا فايسبوكيا وحطو صور القدس باش يعبروا على السخط ديالهم ضد القرار.
سياسة الدق والسكات..
بعد ارتفاع أسعار العديد من المواد الغذائية والبنزين ، وفرض غرامات جديدة، وارتفاع تكاليف البيرمي والباسبور، المغاربة دارو حملة فايسبوكية وكيقولو باللي ف2018 تقدر توصل حتى لمقاطعة بعض المواد.
امري يا الوالدة..
كروب فالفايس دار مبادرة خيرية ومشاو عند نساء مسنات وعاونوهم.
إصلاح منزل وتأثيته..
كروب “مغربيات أجمل نساء الكون” دارو مبادرة وعاونو العائلة اللي كانت الدار عندهم آيلة للسقوط، وفرشو ليهم الدار.
نداء مول شكارة عتق عائلة..
دار لايف مع واحد السيدة كانت ساكنة فطواليط وكيطلب المساعدة، وفي أقل من 24 ساعة توصلت بمساعدات ولقات فين تسكن ولقاو خدمة لرجلها.
حملة تبرع بالدم..
أطلق “محبو سعد المجرد” باسم الأغنية ديالو “let go” حملة للتبرع بالدم بسبب قلة المخزون في المراكز. حملة لقات تفاعل كبير من طرف كروبات أخرى وصفحات اللي شاركات فيها.
