هاد الأيام صور كثيرة منتشرة على مواقع التواصل الاجتماعي كيقولو المروجين ديالها باللي ديال الفنان يونس البولماني من بعد ما دار “نيو لوك” وبانت عليه الفلوس، خاصة أن هاد الصور كيحطها حساب على إنستغرام عندو نفس اسم الفنان وعدد متابعين كبير.
وفي اتصال لموقع “كيفاش” مع الفنان البولماني، قال ابن مدينة أرفود باللي الصور معدلة فقط بالفوتوشوب وما كاين حتى شي تغيير فالشكل، وباللي داك الحساب ماشي ديالو فالأصل.
وفالتصريح ديالو، قال صاحب أغنية “حتى لقيت اللي تبغيني”: “هاد الصور غير فوتوشوب، وأنا كنبغي نبقى كيف عرفوني الناس، اللي كيحط هاد الشي واحد من المحبين ومن ولاد الشعب البسطاء، اللي كيبغي يضحك وأنا ما عنديش مشكل”.
ومن جهة أخرى، قال البولماني أن عندو حساب واحد فإنستغرام فيه عدد ما فايتش 11 ألف متابع وكيتسنى حتى يرجع رسمي ويرجع يتفاعل فيه أكثر.
