من بعد قرارات الملك محمد السادس بإعفاء عدد من الوزراء والمسؤولين من المناصب ديالهم، الفايسبوكيين اللي حاضيين الشادة والفادة مقشبين على برنامج “في قفص الاتهام”، اللي كيدوز فإذاعة “ميد راديو”.
الفايسبوكيين قالو بأن برنامج “في قفص الاتهام” غير كدوز فيه كتطفى ليك الشمعة، ودارو تصاور ديال المسؤولين اللي دازو عندو، قبل ما يعفيهم الملك من المهام ديالهم.
الإعلامي رشيد الإدريسي كتب تدوينة على الفايس بوك: “الزميل والصحفي اللي عزيز عليا، و هوا عارفها، رضوان الرمضاني، إن شاء الله بحول الله، هو خليفة الأخ الأكبر واللي كنحتارمو كثر من نفسي، عتيق بنشيكر فبرنامج مسار”.
فايسبوكي آخر نشر تدوينة يقول فيها: “زوج ديال الناس ما تمشي عندهم حتى تصلي صلاة الاستخارة… قفص الاتهام ومسار”.
واحد الفايسبوكي جبد محمد حصاد، الوزير الأسبق للتعليم والتربية الوطنية، اللي كان دار أول وأخير خروج إعلامي ليه، وكتب فتوينة: “جديد: الرمضاني هو الضولمي فيرسيون 2.1 خرج على حصاد بعد أقل من اسبوع على حلقة في قفص الاتهام”.
