أكد أحمد البواري، وزير الفلاحة والصيد البحري والتنمية القروية والمياه والغابات، أن الموسم الفلاحي الحالي يحمل مؤشرات إيجابي، قائلا: “العام ماشي غير زين، زين وزين مزيان، هادي سنوات وحنا كنتسناو الشتا، والحمد لله هاد العام جات أمطار الخير”.
وأوضح الوزير، خلال استضافته اليوم الأربعاء (29 أبريل)، في برنامج “مع الرمضاني”، على القناة الثانية “دوزيم”، أن “هاد الأمطار غتخلي يكون عندنا موسم فلاحي جد مميز، وتعاود شوية ديال الحركية والحركة والرواج فالعالم القروي، عند الفلاحة والكسابة اللي كيستبشرو خير”.
وأضاف قائلا: “الحمد لله هذه السنة كنتوقعو واحد المحصول ديال 90 مليون قنطار، الضعف ديال العام الفايت، واخا بدينا الموسم معطلين ولكن الحمد لله استدركنا”.
وفي السياق ذاته، وجه الوزير شكره إلى “الفلاحين والكسابة الذين انخرطوا في هذه الدينامية”، معبرا عن تفاؤله بالقول: “إن شاء الله هاد العام والعام الجاي حتى هو غنبداوه بالأمل”.
كما أشار إلى أن “هاد السنة عرفت بلادنا تساقطات مطرية جد مهمة، وصلت تقريبا 555 ملمتر إلى حدود اليوم، بزيادة ديال 52 فالمية مقارنة بالمعدل خلال 30 سنة الأخيرة، والضعف ديال العام الفايت”.
وسجل أن “هاد الشي خلا مخزون السدود يوصل تقريبا 13 مليار، العام الفايت فنفس هاد الوقت كنا قل من 6 دالمليار، ونسبة الملء ديال السدود ديال 76 فالمية، واللي هي نسبة ماشفناهاش هادي سنين، والعام الفايت كنا قل من 30 فالمية”.
