المازوط فايت ليصانص والثمن هادي شهر ما نقصو منو، واش كاينة شي مراجعة في أسعار المحروقات كيف كيروج على مواقع التواصل الاجتماعي؟
واش الأثمنة غادي ينقصو؟
وفي تعليقه على الموضوع، أوضح الطيب بنعلي، نائب رئيس الجامعة الوطنية لأرباب وتجار ومسيري محطات الوقود بالمغرب، في تصريح لموقع “كيفاش” أنه إلى حدود اللحظة ليس هناك أي جديد في أثمنة أسعار المحروقات في المملكة.
وقال بنعلي في اتصال مع الموقع “حنا كجامعة وطنية ما عندنا حتى معلومة جديدة بخصوص الأسعار، وفاش كيكون شي تغيير في الأثمنة الشركات كيخبرونا بليلة قبل كيقولو لينا را مع الطناش دالليل غادي يتبدل الثمن، دابا ما نقدرش نأكد وما نقدرش ننفي حيت ما زال ما توصلنا بحتى شي ميصاج”.
وأشار إلى أنه “حتى حنا كنسمعو الإشاعات اللي كتروج بلي غادي يكون انخفاض ولكن حتى حاجة رسمية ما كاينة، وشحال من مرة كيخرجو بحال هاد الإشاعات وما كيتنقص والو، حيت الشركات النفطية هما اللي كيحددو الثمن اللي غادي يبيعو به”.
علاش الأثمنة مرتفعة في المغرب؟
وفسر بنعلي سبب ارتفاع سعر المحروقات في المغرب بأن الأخير يستورد الغازوال والبنزين الصافي وليس برميل النفط الخام، قائلا “المغرب كيستورد الغازوال والثمن ديالو ما كيخضعش للسوق الدولية، وثمن النفط الخام ماشي هو ثمن الغازوال والبنزين الصافي”.
وتابع “دابا السياسة التجارية في كل شركة هي اللي كتحدد الثمن، ما بقاوش كيمشيو على حسب السوق الدولية”.
شحال واصل ثمن المازوط وليصانص؟
يشار إلى أن أسعار المحروقات ما زالت مرتفعة في المملكة رغم انخفاض سعر النفط عالميا، إذ أن سعر الغازوال يختلف من حطة إلى أخرى حيث يتراوح بين 14.99 و15.64، في حين سعر البنزين يتجاوز 15.80 للترا الواحد في بعض المحطات.
