كشف الإطار الوطني، ادريس عبيس، عن سبب الهزيمة التي تعرض لها المنتخب الوطني المغربي، يوم أمس الأربعاء (14 دجنبر)، على يد المنتخب الفرنسي في دور نصف نهائي كأس العالم قطر 2022.
وقال عبيس في تصريح لموقع “كيفاش” إن “الهزيمة فيها عوامل مشتركة اللي خلاتنا أمام المنتخب الفرنسي نكونو في غير الجاهزية ديالنا وخاصة على المستوى الذهني”.
وأضاف “أول حاجة تغيرات هو الطاكتيك باش ولفنا ندخلو، 5 4 1 هذا كان في قراءة على أساس أننا حنا نضيقو المساحات ونعطيو للمنتخب الفرنسي هو اللي يدير الاستحواذ وبناء الهجمة لكن ولى العكس، ربما حيت عندنا عدد كثير ديال المدافعين ولينا حنا اللي كنديرو بناء الهجمة وواحد البطء، واللي ما خلاش أنك تخرج للمنطقة ديال تصويب الكرة بالشكل المطلوب لأنه كانت تمريرات خاطئة خصوصا على مستوى وسط الميدان واللي جات فيها هجمة مرتدة، اللي كان خطأ فردي في التغطية ديال ياميق واللي خلات اننا نغيرو الهدف والسلوك ديالنا”.
وشدد عبيس على أن “هاد التغييرات كلها خلات المنتخب المغربي يدخل فالارتباك والتسرع خاصة في بناء الهجمة”.
وأوضح الإطار الوطني بأن “المنتخب الفرنسي توفق علينا بخبرتهم على مستوى خط الهجوم، وحنا على مستوى الدفاع ما لعبناش بالنمط ديالنا اللي كان كلاسيكي واللي يخليهم هما يبادرو، عطيناهم فرص وجاوهم 2 اللي ما كانش فيهم مجهود كبير، سجلو الهدفين،
حنا جاونا فرص ولكن ما كناش محظوظين وجاو فالدقائق الأخيرة”.
وختم حديثه بالقول” نتمناو فمباراة الترتيب يلعب المنتخب المغربي بجسمو بثقافتو وبالأعراف اللي ولف عليها الجمهور، وكنتمناو ان حتى على مستوى الخبرة تخلي وليد يدير واحد النقد ذاتي ويدير مراجعة على مستوى الأفكار اللي كتوقع فهاد المباريات النهائية”.
وكان مدرب المنتخب الفرنسي ديدييه ديشامب، أقر بأن المغرب يمتلك أحسن دفاع في مونديال قطر.
وصرح المدرب الفرنسي للصحافة قبل مواجهة المنتخب، أن” المنتخب المغربي دافع أحسن من أي منتخب آخر… المغرب يمتلك أحسن وأفضل دفاع في المونديال”.
يذكر أن المنتخب الوطني المغربي ودع كأس العالم، يوم أمس الأربعاء، بعد الهزيمة بهدفين دون رد أمام المنتخب الفرنسي.