محمد محلا
“من حقي نتكلم على المغرب اللي أنا عايشة فيه، واللي يتبرزط من هاد الشي يمشي يشوف غيرو”، هكذا ختمت مايسة كلامها في برنامج “كيفاش”، الذي أذيع اليوم الجميعة (26 يوليوز) على إذاعة ميد راديو.
مايسة، التي كثرت الانتقادات الموجهة إلى ما تكتب وتقدم من برامج على موقع “هيسبريس”، والتي دعا بعض النشطاء الفايسبوكيين إلى مقاضاتها بسبب ما تعبر عنه من أفكار، قالت إن برنامجها الجديد لا علاقة له بالدعوة، بل إن يسلط الضوء على الواقع الاجتماعي.
رمضان وشي مرات كيكون الدم سخون شوية، واش ما كيعصبوكش دوك الانتقادات اللي عمر بيها الفايس بوك؟
الصراحة ولفتهم، الواحد ملي كيولف شي حاجة ما كتبقاش تأثر فيه بزاف، ولكن كاين شي انتقادات الواحد كياخذها بعين الاعتبار، بحال الانتقدات على الأفكار أو على البرنامج الذي أقدمه، أما الانقادات اللي ولفناهم ديال جلابتك زرقاء ماشي خضراء ولا صفراء ماشي حمراء واحد الوقت ما كيبقاش يدي عليها الإنسان.
في إذاعة ميد راديو في شهر أبريل اللي فات، قلت انت ماشي داعية، اليوم وليتي كتديري برنامج على موقع مغربي فيه الدعوة والنصيحة. كيفاش هاد الشي؟
لا، البرنامج اللي كندير ما فيه لا دعوية ولا نصيحة، بالعكس هو برنامج اجتماعي كنحاول ما أمكن نخرج من الدعوة والواحد يبدا كيدير على الناس أستاذ، أنا درت البرنامج حيت شفت خصاص في الإعلام اللي كيبين الواقع بلا زواق، وأنا قررت ناخذ المبادرة باش نوصف داك الشي اللي عايشين فيه بلا دعوة. أنا باقا عند كلمتي، لست داعية وما عنديش نية يعيطو لي شي مرات بالداعية مايسة.
شي نهار نشوفوك في التلفزيون؟
ما عرفت أنا ما كنبلانيش بزاف للمستقبل، بالخصوص ملي كندير شي حاجة كنبغيها.
بزاف ديال الناس برزطيهم بالأفكار ديالكم، باش كتردي عليهم؟
الإنسان ملي كيقدم شي حاجة ما كيفرضهاش عليك، لأن في الأخير هادي ماشي التلفزة الوطنية، وحتى التلفزة يمكن الواحد يبدل القناة في الحقيقة، هادي الأنترنت أنت كتمشي تقلب الصفحة ديالي ولا الفيديو ديالي، كيفاش يلا ما عجبكش المرة الأولى والثانية تشوفو المرة الثالثة والرابعة والخامسة؟ أنا شابة مغربية عندي أفكار كنمثل فئة صغيرة من الناس اللي كيتافقو معايا واللي كيعجبهم داك الشي اللي كنقدم، ومن حقي نتكلم على المغرب اللي أنا عايشة فيه، واللي يتبرزط من هاد الشي يمشي يشوف غيرو، وغيرو كاين بزاف من البرامج اللي تعجبهم وتمتعهم.
