دابا بيناتنا يا الدراري (الدريات ما عليهم هضرة اليوم)، واش ما عجبكمش الحال تشوفو فاطيم العياشي وهي (شبه) عريانة فالفيلم “موشومة”؟
كيظهر لي، والله أعلم، شحال من واحد دار ما دار الفقيه المعلوم، اللي كيشوف بنت زوينة وتابعها بعينيه وكيقول: أستغفر الله، أستغفر الله، أستغفر الله…
أنا بعدا والله يلا عجبني الحال، وما كرهتش نتلاقى فاطيم ونقول ليه: خمسة وخميس عليك، ويلا بغيتو تقولو علي مكبوت ولا مريض ولا قليل الإيمان دبرو راسكم. أنا، واخا فقيه، ولكن كيعجبني الحال نشوف البنيتات الزوينات.
وباش نكون معاكم واضح، كون كنت بلاصة الحسن زينون ما غاديش نقلب التبريرات ديال العرا فالفيلم، حيت العرا من أجل العرا ماشي مشكل.
وها العار بلا معيور، وحتى يلا عايرتو عايرو بكلام زوين، حيت ما كنفهمش واحد ما عاجبوش فيلم ولا مسرحية، وكيقول باللي الله سبحانه وتعالى غادي يغضب، وهو كيدير “الجهاد” بالهضرة ديال الزنقة، اللي بغا الدليل يمشي ليوتوب ويشوف التعليقات على زينون والعاجي وعصيد ورحيم ديال مالي. هاد الناس اللي من هاد النوع كنقول ليهم: نقيو فامكم عاد نقيو السينما.
تشاو تشاو.
