[email protected]
حنا دابا فشهر دجنبر 2012. ياك ولا لا؟ إيوا فينا هي بطولة كرة السلة؟ فينا هي بطولة كرة اليد؟ فينا هي بطولة الكرة الطائرة والسباحة والدراجات ووووو… شكون فيكم باقي عاقل على هاذ الرياضات؟
كان المفروض، بعد نكسة الرياضة المغربية في أولمبياد لندن، اللي خسرنا عليها 13 مليار سنتيم باش نجيبو جالوقة ديال النحاس، أن المسؤولين على الرياضة المغربية يتحزمو ويترزمو ويشمرو على يديهم باش يتوقف النزيف وتعاود الرياضة ديالنا توقف على رجليها ولكن العكس هو اللي واقع.
البطولات ديال العديد من الرياضات ما زال ما بداتش فهاذ البلاد التعيسة عكس ما حاصل في باقي دول العالم. من غير بطولة كرة القدم، اللي مازال غادية واخا حتى هي عرجا وعوجا وفيها بزاف ديال العيوب، فباقي الرياضات “محتجبة” ويمكن غادية تبرك في الدار وتدير الخمار! واللي باقي كيبان في الصورة هي الجامعات الموقرة بحال جامعة كرة السلة، اللي كتعيش منذ شهور بلا رئيس وبلا مكتب شرعي والنتيجة هي معظم الأندية رافضة تلعب البطولة. جامعة كرة اليد حتى هي فحالة يرثى لها بعدما رفضت الوزارة صرف المنحة ديالها في انتظار التوصل بالوثائق المالية الخاصة بيها والجامعات ديال السباحة والكرة الطائرة حتى هي ولى وجودها بحال عدمو.
هاد الشي اللي واقع للرياضة المغربية ما كيبشرش بالخير. الله يحضر السلامة وصافي من اللي جاي، يلا بقات الصراعات على الكراسي هي اللي مسيطرة على عقول المسيرين والطامعين في منصاب التسيير، والنتيجة اللي ولات باينة للعمى وهي أن الرياضة المغربية ما بقاتش غادية للقدام بشوية كيف ما كانت من شحال هاذي. الرياضة المغربية وقفات ببساطة لأنها ولات راجعة للور.
إيوا الله ياخذ الحق في اللي كانوا سباب. قولوا آمين!
