“كيبعو القدر ويضحكو على اللي شراه” هاد المثل الشعبي هو باش نمثلو الحدث الاستثنائي اللي وقع ف”كان 2019″، مع المدافع الكيني اللي لقى راسو حديث رواد مواقع التواصل الاجتماعي فالمغرب وهو ما فراسو والو.
اللاعب الكيني دينيس أودهيامبو بان لأول مرة قدام الجمهور المغربي فالماتش ديال الفريق ديالو ضد المنتخب الجزائري، ومن بعد فاش سالا الماتش بزاف ديال المغاربة لاحو الصور ديالو فالفايس بوك وكيقولو باللي المخرج ركز عليه حيت “الشكل ديال راسو غريب”.
وبداو كيطلقو حملات ضد العنصرية، وبقى هاد الشي كيتطور لدرجة خرجو قصة باللي اللاعب تقلق ومشا فحالو لكينيا بسبب العنصرية، وباللي عطى تصريح لقناة ألمانية كيتشكي من المعاملة ديال الناس.
الحقيقة هي أن دينيس ما عطى لا تصريح وما وقعت ليه حتى شي حاجة من هاد الشي، وتركيز المخرج عليه فالمباراة ديال الجزائر كان بسبب أنه هو المسؤول على الهدف اللي تسجل على المنتخب الكيني، الشي اللي خلا المدرب يخرجو من الملعب ويدخل بلاصتو لاعب آخر.
الصحافة الكينية هضرات على موضوع دينيس بتفصيل، وقالت باللي كيتحمل المسؤولية ديال الهدف اللي تسجل عليهم، وباللي المدرب غالبا ما غاديش يلعبو فالماتش ضد زيمبابوي، وداك الشي اللي وقع حيت البارح الخميس (28 يونيو)، ما لعبش وكان فالاحتياط وكان فرحان بالفوز ديال المنتخب ديالو في الماتش اللي تسالا ب3-2 فواحد من أحسن الماتشات لحد الآن ف”كان 2019″.
