علق ضابط الأمن السابق عبد القادر الخراز، الذي أصبح نجم من نجوم اليوتوب في بأسلوبه المشوق في رواية القصص البوليسية وسرده الممتع للتفاصيل، على مشاركته في الفيديو كليب الأخير لمغني الراب عمر السهيلي المعروف بـ”ديزي دروس”.
وقال الخراز في اتصال هاتفي مع موقع “كيفاش”، “ديزي دروس صاحبي وكنهضرو يوميا، كنا جالسين هضرنا على الكليب قبل ما يديرو، قال ليا غنجيب شي واحد غيمثل بوليسي قلت ليه أنا نمثل بوليسي، صافي قبلت بالفكرة ومديت ليه يد المساعدة حيت أنا عندي دراية بالبحث ديال البوليس ودزت من داك الشي، والحمد لله المشروع نجح”.
وأضاف الخراز “أنا كيعجبوني الأغاني ديال ديزي دروس من ناحية الكلمات وحتى اللحن، وهو وليد كيحترم راسو وكيبغي بلادو وكيحترم الناس اللي كيخدمو معاه، ودفع بأغنية الراب للأمام”.
وفي رده على التعليقات التي اعتبرت أن مشاركته رفقة ديزي دروس كانت ضد العناصر الأمنية، قال الخراز “أنا عمرني كنت ضد الأمن، وفي الفيديو كليب ما كاين حتى حاجة كتبين أننا ضد الأمن، حنا فقط كنا كنبحثو مع السيد ما كناش كنعنفوه ولا نضربوه باش نقولو أن الأمن كان قاهر، كان مجرد بحث والبحث في العالم كامل كيكون بهاديك الطريقة ديال الغوات”.
وأبرز الخراز “أنا كنعاون الشباب دابا وليدات كانو سجناء دارو قنوات على اليوتوب وكيعاودو قصص بوليسية تقريبا بحال اللي كندير أنا، وكينصحو الناس باش ما يطيحوش فنفس الأخطاء اللي طاحو فيهم، وأنا قررت ندير ليهم إشهارات فابور ونعاونهم”، مضيفا “أنا ما خاصنيش نحتكر السوق وأنا بوحدي اللي نبان بالعكس أنا اللي بان ليا عندو محتوى مزيان كنعاونو… وأنا كندفع بالشباب للأمام وما عندي حتى غاية من هاد الشي”.
وختم الخراز حديثه بالقول “أنا مديت يد المساعدة لديزي دروس وعجبني الكليب ديالو وعجبتني الفكرة اللي دار وأنا بنت غير في فلاش صغير 2 مرات”.
ولم يفصح عبد القادر الخراز عن المبلغ الذي تقاضاه من أجل مشاركته في فيديو كليب “مع العشران”، معتبرا أن الأمر يتعلق بتعاقد شخصي وسري مع المنتج، وبالتالي لا يمكن الإفصاح عنه.
يذكر أن الرابور الشاب ديزي دروس، طرح يوم أمس الثلاثاء (14 فبراير)، أغنيته الجديدة بعنوان “مع العشران”، على قناته الرسمية على اليوتيوب، تزامنا مع عيد الحب.
وفي جديده، اعتمد ديزي دروس على “الكلاش” لتوجيه مجموعة من الرسائل للمسؤولين والفنانين والمؤثرين.
وبين الشخصيات التي انتقدها ديزي دروس في العمل الجديد، رئيس الحكومة عزيز أخنوش، والفنانة منال بنشليخة، والمؤثرة أسماء بيوتي، والرابور دون بيغ.
وتفاعل كثيرون مع أغنية ديزي دروس والكليب الخاص بها، حيث تجاوز عدد مشاهداتها في أقل من يوم أزيد من مليوني مشاهدة على اليوتيوب.
