زينون وزيطان وأحرار.. صحاب الصداع تلاقاو بنكيران

أحمد فنان

زوينة ديك القضية اللي دارها بنكيران مع الفنانين المغاربة، اليوم الثلاثاء (27 نونبر). كيفاش؟

حضرت مجموعة من الحساسيات الفنية لقاء في مقر رئاسة الحكومة مع عبد الإله بنكيران، رئيس الحكومة، سمع فيه هذا الأخيرة اقتراحات الفناني، وعطا الدليل على أنه ما عندوش هاد الحساسية كاملة تجاه الفن بحال اللي كيقولو عليه الناس ولا على الحزب ديالو.

وعلم موقع “كيفاش” أن بنكيران أصر على حضور وجوه معينة محسوبة على الصف الحداثي، والتي قدمت أعمالا أثارت انتقاد أعضاء في حزب العدالة والتنمية وحركة التوحيد والإصلاح مثل لطيفة أحرار، اللي قدمات مسرحية “كفر ناعوم”، ولحسن زينون اللي قدم فيلم “موشومة”، ونعيمة زيطان اللي قدمات مسرحية “ديالي” ولا غيرهم.

هاد الاختيار كان مقصود، حساب مصدر “كيفاش”، وكان المراد منه أن يقال أن بنكيران ما عندو حتى مشكل لا هو ولا الحزب ديالو مع تعبيرات فنية معينة، واخا تكون جريئة، وواخا الحركة اللي مور الحزب تعبر على مواقف أخرى ولا تطالب بفرض الرقابة اللي ما كايناش وما عمرها غادية تكون في المغرب.

خطوة مزيانة فكل الاتجاهات.