[email protected]
المنتخب المغربي عقد الوضعية ديالو كيف العادة. تعادل مع أنغولا وقلنا ما كاين باس. والطاوسي قال بأن المنتخب المغربي غادي يكون أفضل في المباراة الثانية وغادي يكون أكثر فعالية أمام الرأس الأخضر. ولكن ما شفنا والو. شفنا منتخب مهزوز. منتخب زرك بكل ما في الكلمة من معنى. ومن بعد التعادل الثاني مع الرأس الأخضر اكتشفنا منتخب كل واحد فيه كيلقي بالتهمة على الطرف الآخر. الطاوسي لام الأحمدي على الخطأ اللي ارتاكبو، وقال بأن بعض اللاعبين ما كانوش يستاحقو يلعبو ضد الرأس الأخضر. والركراكي قال بأن المغرب خاصو لاعبين كيتقاتلو باش يربحو، ماشي لاعبين اللي بمجرد ما كيدخلو للملعب كيعتاقدو أنهم رابحين.
أما المياغري فقال اللي ما قالوا حتى واحد. قال: “ما كاين لاخطة لاوالو.. خاص الروح والنفس باش ننتاصروا”. هاذ التصريح وضع حارس المنتخب تحت ضغوط كبيرة من طرف الناس ديال الجامعة، واضطر باش ينشر فيديو كيحاول يشرح فيه أنه ما قصدش يهين الطاوسي.
الحاصول دابا اللي عطا الله عطاه. عندنا خيار واحد باش ما نرجعوا بكري كيف العادة. خاصنا نربحوا جنوب إفريقيا. وما يمكنش نربحوها إلا ايلا لعبنا لعب الرجال وكنا مقاتلين ديال بصح فوق أرضية الملعب.
