قبل 5 أيام مرات زعيم خلية إرهابية اللي تشد فتمارة فعملية تفكيك الخلية اللي كانت فأربعة مدن، خرجات كتبكي وكتقول باللي رجلها مظلوم وما دار حتى حاجة، وباللي هي براسها كون كانت عارفة باللي رجلها كيدير هاد الشي كون مشات بلغات بيه البوليس، وباللي كاع المواد المتفجرة اللي لقاو عندو والمواس ما كانوش عندها فالدار، فاتهام مباشر باللي عناصر البسيج اللي جابو داك الشي.
هاد التصريحات خلات مجموعة من الناس على السوشل ميديا تتعاطف مع السيدة، واللي خرجات دموع التماسيح، وبقات كتقول “حسبنا الله ونعم الوكيل” وكتقول أدعية كتصور راسها مظلومة هي وراجلها، وحيث كاينة مجموعة فالفايس كتقلب غي تشكك فكل ما هو رسمي، وكتبع العاطفة ديالها، تيقو هاد المرا، اللي سبقات فكلامها باللي “صلات الفجر هي ورجلها قبل ما يدخلو عليهم عناصر البسيج”، وباللي رجلها “ملتزم وكيخاف الله وما يقدر يهز حتى موس”.
إقرأ أيضا: بغات تغطي على رجلها.. “البسيج” ينفي ادعاءات زوجة “إرهابي تمارة”
من بعد هاد المسرحية، مرات الإرهابي اعترفت فمقر البسيج بكل الشي، وقالت باللي هي كانت عارفة رجلها شنو كان عوال يدير، وأنه كان عوال يذبح جارو حيث شك فيه شيعي، وباللي كان كيشم ريحة الجنة، بل الأكثر من داك الشي هي براسها بايعت زعيم داعش، وأنها تشبعت بالفكر الإرهابي والمتطرف حيث كان كيشعل ليها فيديوهات وأشرطة خاصة بهاد الشي.
القضية ما وقفاتش عند هاد الحد، وإنما السيدة ورات عناصر البسيج واحد الگراج فين كان راجلها مخبي مواد متفجرة، وحسب صور وفيديوهات توصل بيهم موقع “كيفاش” من عين المكان، السيدة غادية بكل ثقة حتى وصلاتهم للبلاصة المعلومة.
إقرأ أيضا: خباهم فگراج ديال عمارة.. العثور على مواد متفجرة وقابلة للاشتعال تعود ل”إرهابي تمارة” (صور وفيديو)
هاد القضية ديال دموع التماسيح والتمثيل فالفيديوهات ماشي أول مرة كتكون، وإنما بزاف ديال الناس تيستغلو مواقع التواصل الاجتماعي باش ينشرو أكاذيب ويبنو راسهم مظلومين، وللأسف كاينة شريحة كبيرة ديال رواد السوشل ميديا كتقلب غير وقتاش تلقى بحال هاد الفرص باش تدير البارطاج وتنشر أمور بدون أي تمحيص أو تدقيق.
