من بعد “كيكي”، واحد من التحديات الخطيرة اللي تمنع فبعض الدول، بان تحدي جديد فيه نوع من العياقة. كيفاش؟
“السقوط من السيارة” أو “فايلين ستار” هو آخر تحدي بان في مواقع التواصل الاجتماعي، والمبدأ ديالو هو أن المنخرط فيه يبان طاح على وجهو من طوموبيل ولا طيارة وحوايجو طايحين حداه.
اللي مبدل في هاد التحدي، هو أن أغلب المشاركين فيه خارجين من طوموبيلات واعرين، والحوايج اللي طايحين غاليين.
وطبعا، المعلقين المغاربة بداو بالطنز من دابا، وكاين اللي قال باللي هاد التحدي خاص بالطبقة الراقية.
واحد من المعلقين قال بسخرية: “الله يخليكم، قبل ما يوصل هاد التحدي للمغرب بلا ما تشوهوه، طوموبيلة فيراري وصاك لوي فيتون ولا بلاش”. وقال آخر: “هاد التحدي يلا جا المغرب، غادي تكثر غير السرقة، واش كاين اللي يخليك تصور هاكا”.
وللإشارة، فإن تحدي “فايلين ستار” بدا شهر غشت اللي فات، ولكن بقى محصور عند الطبقة الغنية فقط.
