محمد المبارك
بعد 14 يوم من أول نداء وجهته، جمع الناشط الفايسبوكي يوسف الزروالي 46 مليون و8000 درهم، لفائدة السيدة خديجة، أم لخمسة أيتام، اللي كانت كتعيش في ظروف صعبة مع ولادها، وكانت باغية شي واحد يخلص عليها فلوس الكراء لمدة سنة، لأن ما عندهاش معيل.
وحسب ما جاء على لسان يوسف، في فيديو نشره على صفحته، هاد الفلوس تجمعات في ظرف 14 يوم، وصيفطوها مغاربة من داخل وخارج أرض الوطن، وأن السيدة غادي تشري بيها منزل من 3 طبقات باش تسكن في طبقة وتكتري الآخرين.
ومن جهة أخرى، شكرت السيدة خديجة كاع الناس اللي عاونوها، وغلبتها دموع الفرح، لأنها ما توقعاتش هاد الفلوس كلها تكون من نصيبها.
وفي نهاية الفيديو، يوسف رد على الناس اللي قالو عليه سرقتي ليها فلوسها، ودار فيديو من أمام البنك باش يأكد للناس أنه حط ليها فلوسها فالحساب البنكي ديالها.
