محمد محلا
إلياس، أو الشيخ سار، كما يطلق على نفسه فنيا، أطلق أغنية جديدة بعنوان “واهيا بنكيران” تيمنا بـ”بسي” اللي غنى “غانغام ستايل”. مغني الراب لبس ثوب المعارضة “ديال الفز”، كما أسماها في حوار مع موقع “كيفاش”، وشد فيهم شوية.
واش أنت مع بنكيران ولا مع العفاريت والتماسيح؟
(يضحك) مشكلة هادي، بروبليم أعشيري. أنا مع بنكيران.
خرجتي أغنية على رئيس الحكومة سميتيها “واهيا بنكيران”، تيمنا بـ”بسي” اللي غنى “غانغام ستايل”. آش بغيتي توصل منها؟
الأغنية بزاف ديال الناس ما فهموهاش.
(مقاطعا) وعلاش ما فهموهاش؟
حيت الستيل جديد، والناس ما فاهمينش باللي الفنان ممكن يلبس الشخصية، يولي بحال ممثل، وكيغني بلسانها. وأنا لبست شخصية المعارضة ديال الفز، وغنيت بلسانها، والكلمات كتشرح راسها. ودابا راه الناس فهمو الأغنية ودارت البوز في الانترنت، وتشافت 130 ألف مرة في أقل من 3 أيام على يوتوب.
شي وحدين راه قالو عليك كتفلى على رئيس الحكومة. واش بصح؟
واش غادي نقول ليك، راه الناس ديال العدالة والتنمية هوما اللي عجباتهم بزاف، وهوما اللي بارطجاوها. كيفاش غادي نتفلى على بنكيران؟ أنا قلت غير داك الشي اللي كيقولو المعارضة.
ما خايفش يخرجو ليك شي تماسيح حجرية يقولو ليك آش داك لشي سخرية فنية سياسية؟
من طبيعة الحال التماسيح ديما خارجين ليا، وكاينين بزاف ديال الانتقادات، والقيمة ديال المنتوج هو يكثر عليه الانتقاد، ولكن كاين حتى المساندة بزاف.
