تحدث منير الجعواني، المدرب السابق لفريق المغرب الفاسي، عن تجربته مع فيروس كورونا المستجد.
وقال منير الجعواني، في تصريح لموقع “كيفاش”، إن “فيروس كورونا هو فيروس خطير حيت شي حاجة خفية وهاد الفيروس حنا اللي كنمشيو عندو ما شي هو اللي كيجي عندنا هاد الشي علاش السلطات كيطلبو منا نبقاو فدارنا”.
وأضاف الجعواني “أنا ما عرفتش منين جاني الفيروس وفالحجر الصحي الأول تقريبا 3 شهور ما خرجت من الدار فاش بدينا التداريب ودرنا معسكر مع الفريق تما فين عرفت راسي مريض ولكن منين تعاديت ما عرفتش”.
وتابع المدرب الأسبق لفريق نهضة بركان “أنا ما حسيت بحتى شي أعراض وحتى فاش جابوا التحاليل كنت فوسط التداريب حتى جاو عندي الأطباء قالو ليا را فيك كورونا التحاليل طلعو إيجابيين”.
وواصل الجعواني حديثه عن قصته مع فيروس كورونا “دوزت فترة العلاج فمستشفى سيدي سعيد فمكناس الحمد لله تهلاو فينا وكانت العناية والنظافة والدوا والرديوهات وماشي غير حنا حتى الناس اللي كانو معانا… دوزت 5 أيام وخرجت”.
وختم الجعواني حديثه “انا كنقول للمغاربة كاملين حاولو ما أمكن تردو البال لراسكم ولوليداتكم ولعائلاتكم… دابا أنا واخا الأطباء قالو ليا انت دابا بحال يلا دوزتي بوحمرون ما بقاش غيرجع ليك ولكن واخا هكاك كنبعد من الناس وما بقيتش كنسلم وديما داير الكمامة وحتى يلا بغى يسلم عليا شي حد كنقول ليه سمح ليا را أنا اللي غنعاديك ماشي انت… ونتمناو ان شاء الله من الله يحبس علينا هاد الوباء وحنا كمغاربة نديرو اليد فاليد وحنا نتغلبو على هاد الفيروس”.
