برنامج “90 داي فيونسي” واحد من أشهر البرامج الأمريكية المتعلقة بالزواج، والمبدأ ديالو أنهم كيجيبو عدد من “الكوبلات”، بنات أمريكيات مع أجانب، وكيشوفو من بعد 90 يوم مع بعضهم واش ممكن يتم الزواج وتجيب الشابة الأمريكية زوجها راجلها معها في أمريكا.
بداية علاقة حسن ونيكول في البرنامج
في النسخة ديال هاد السنة، كان مغربي سميتو حسن تيفو، مع أمريكية سميتها نيكول، وكانوا من أكثر “ليكوبل” إثارة للجدل، خاصة أنه كانت بيناتهم علاقة طويلة، وكانوا كذلك من الشخصيات المعروفة على مواقع التواصل الاجتماعي.
بان أن علاقة حسن ونيكول كانت من العلاقات المتميزة في البرنامج، ورجعات حديث المتابعين، علاقة مليئة بالعواطف والذكريات الزوينة والتفاهم، ومن بعد جا وقت الحسم، وسافرت نيكول للمغرب باش تزوج وتجيب معاها حسن.
قدوم نيكول إلى المغرب وإلغاء العرس
من بعد أسبوع فالمغرب، خرجات نيكول وحسن بتصريحات صدمات المتابعين ديال البرنامج، قالوا باللي ما غاديش يديرو العرس، وأن ديك الفلوس ديال العرس غادي يستغلوها لمشروع بغا يديرو حسن في المغرب.
هاد الشي ما كيتوافقش مع شروط البرنامج، اللي كتنص على أنه يدار عرس ويدار فيديو يشوفوه المتابعين، والغريب في الأمر أن نيكول، قبل ما تجي للمغرب، تكلفات واحد دار الموضة معروفة بتصميم فستان العرس، أي أن نيكول جات للمغرب باش تزوج ولا شيء غير ذلك.
عودة نيكول إلى أمريكا والجدل الإعلامي
من بعد عودة نيكول كثرات الأسئلة، خاصة من وسائل الإعلام، واللي راقبو أبسط التفاصيل، منها أن نيكول ما دايراش الخاتم، وكذلك حسن توقف عن نشر الصور ليهم بجوج فإنستغرام.
والخطير أنه خلال البرنامج توصلت نيكول برسائل صوتية ديال حسن مع بنات كيهضرو على علاقات جنسية، بمعنى أن حسن كيخونها، الشي اللي نكرو حسن وقال باللي الرسائل قديمة.
آراء المتابعين الأمريكيين
بالنسبة لمتابعي البرنامج، فإن أغلب التعليقات كتقول أن حسن كان كيستغل نيكول ماديا، وأنه كان طامع غير فالوراق باش يجي لأمريكا، وفاش شاف راسو حصل قدام التلفاز وأنظار العالم قرر يهرب.
المغاربة
ومن جهة أخرى، رأى بعض المتابعين المغاربة أن حسن خذا الفلوس لنيكول ومشا دار بيهم مشروع وخلاها. وقالوا أنه شوه صورة المغاربة قدام الأجانب فواحد من أكثر البرامج متابعة.
رأي نيكول
من بعد الصداع وهاد الشي اللي وقع، نيكول حطات صورة على إنستغرام مع حسن، وكتبات: “سأحبك إلى الأبد”، ومنعت خاصية التعاليق لأن الأغلبية كانوا كيكتبو ليها تفارقي معاه، ومن ديك الوقت ما بقاتش كتحط حتى حاجة عندها علاقة بالبرنامج أو بالعلاقة ديالهم.
