وليداتي السلام عليكم. ها قلبي ها تخمامي ها ما آتاني الله. ديرو النية وباتو مع الحية، وقولو التسليم.
اليوم نقول ليكم آش غادي يوقع بـ2013. بون آني عليكم بعدا، الله يدخلها عليكم بالربح وبالفلوس وبالصحة وبالعدالة الاجتماعية، وبشوية ديال المنطق فالسياسة.
العام الجديد إنشاء الله ما بايناش لي شي حاجة كتفرح فيه. أييه كاينة الشتا، ولكن الجفاف كاين فالعقول.
فالسياسة غاديين نبقاو ماشيين بحال شي سيرك، شي كيقلز لشي، وشي كيحشي الهضرة لشي، ولكن واش كاين شي معقول؟ أنا نقول والو، وانتوما قولو الله أعلم.
فالاقتصاد الله غالب. لالاتي الأزمة غادي تدير الكرون، والحكومة ما كاين غير الطريطات، بحالها بحال الشعب. يلا بغات تشري شي حاجة تمشي عند البانكة الكبيرة ديال العالم.
فالرياضة ما تفرحوش بزاف. الطاوسي تالف، والوليدات اللي معولين عليهم ركابيهم هشاش، وكيف قالو: من الخيمة خارج مايل.
الحاصول بلا ما نكملو الهضرة.
بحال 2012 بحال 2013، الله يرزق غير الصحة والسلامة… والتسليييييم.
