حاورتها: شيماء الباز
بداية، شكون هي الفتاة التي مخبية وراء شخصية “شكيب عصفور”؟
سميتي مونية، عندي 31 سنة، ساكنة في فرنسا خريجة ديال المعهد العالي للفن المسرحي والتنشيط الثقافي فرع التشخيص.
كيف جاتك فكرة الحلقات، والمواضيع التي تختارين؟
الحلقات قررت نديرهم لأنني كنت كنحس براسي باغية نلعب بالدارجة أو نجسد شخصيات سافروا معايا فبالي مني مشيت لفرانسا.
بعد ما لقيت فريق العمل اللي نتفاهم معاه، وعندنا نفس الرؤية الفنية للأشياء أو مكملين بعضنا، قررنا نبداو نصوروا الحلقات وننشرهم في اليوتوب.
المواضيع اللي كنتكلم عليها، ما كنكونش موجدة ليها ودائما، أنا غالبا كنهدر على مواضيع كنحس باللي جا الوقت نهدر عليهم، يعني ما كنديرش الحلقات على حساب جديد الأخبار.
بعد أزيد من ثلاث سنوات من الغياب، عدت من جديد، خلال شهر رمضان عبر قناتك في موقع اليوتوب بحلقات جديدة ومواضيع وشكل جديد أيضا.. فين هاد الغبورات كاملة؟
(تضحك) غبرت هاد الشي كلو؟
أنا براسي ما عرفتش، كملت واحد القراية كانت عندي، إيوا درت وليد، عاد فكرت فهاد شكيب مزيان أو تسنيت الوقت المناسب ورجعت عاوتاني.
علاش قررتي التخفي وراء شخصية رجل؟
أنا ما مخفياش خلف راجل، أنا كنلعب الرجل.. أو غير صدفة، كان ممكن يكون شخصيات أخرى. ولكن شكيب قريب مني، كيجيني هو النقيض ديالي.
في الحلقات ديالك، تتحدثين بلسان الرجل دائما، وقليل فين تدافعين عن المرأة.. علاش زعما؟
أنا ماشي فحرب ديال الرجل ضد المرأة، أو حتى مني كنهدر بلسان الرجل، كنعطيه من وجهة نظر شخصية كتحتقر المرأة، باش نوضح هاد الرجال كيف كيفكروا.
أنا امرأة، وماشي بالضروري يلا خديت الكلمة خاص ندوي عليها ولكن أيضا ماشي باش ندير حرب باسمها..
واش سبق لشي واحد تعرف عليك في الشارع؟
واحد النهار طلعت فالترام ديال الرباط، أو بديت كندوي مع واحد البنت حداية، وأنا نسمع: ياك أشكيب بغيتي تدي خبيرات؟ درت عندو وقلت ليه: الله أخويا الله، كيف عرفتني؟ جاوبني: من الخالات اللي في نيفك.
