جمال الرياضي (مراكش)
الجامعة الملكية لكرة القدم قالت إن المقابلة التي ستجمع، اليوم السبت (13 اكتوبر)، بين المغرب والموزمبيق، غادي تكون بشبابيك مغلقة، ولكن التذاكر ما زال كتباع في مراكش قبل ساعات من الماتش اللي غادي يبدا مع الثمنية ديال الليل.
“كيفاش” قامت بجولة على مراكز البيع الرسمية في ملعب إدريس الحارثي وملعب سيدي يوسف بنعلي ولقات الشبابيك مسدودة ولكن حداها منتاشرين الناس اللي كيبيعو في التذاكر في المارشي نوار والأسعار وصلات لـ60 درهم بالنسبة للتذكرة ديال 30 درهم. إيوا مصيبة هاذي. كاين اللي كيقلب على تذكرة وحدة وما لقاهاش وكاين اللي عندو صوبة ديال التذاكر كيبيعهم بالثمن اللي بغا واخا الجامعة قالت أنه غادي يتم بيع تذكرة وحدة فقط لكل راغب في اقتنائها.
