كشفت الحكومة، يوم أمس الخميس (27 يناير)، عن إعادة فتح المجال الجوي في وجه الرحلات الجوية من وإلى المملكة المغربية ابتداء من 7 فبراير المقبل، وذلك استنادا للمقتضيات القانونية المتعلقة بتدبير حالة الطوارئ الصحية، وتبعا لتوصيات اللجنة العلمية والتقنية، وأخذا بعين الاعتبار تطورات الوضعية الوبائية بالمغرب.
إقرأ أيضا: عاجل.. الحدود تحلو والرحلات الجوية رجعات
وفي تعليقه على هذا القرار، أوضح طاهر المير، مسير وكالة أسفار، في تصريح لموقع “كيفاش”، بأن هذا القرار جاء متأخرا، قائلا “هاد القرار جا معطل، حيت ما كان عندها حتى شي معنى أن الحدود تبقى مسدودة هاد الفترة كاملة”.
الثقة ما بقاتش
وأضاف المير “حنا كوكالة أسفار ولا كقطاع سياحي بصفة عامة ما بقيناش كنتيقو فالقرارات ديال الحكومة، حيت ديما كيبقى عندنا الشك ديال أنه يقدرو يسدو عليك فأي لحظة، والثقة ديال الزبائن ما بقاتش”.
وتابع “دابا حنا مقبلين على شهر رمضان، وأغلبية الوكالات حتى هما كانوا عاقدين آمال على العمرة ديال رمضان، واش غادي يكون إقبال ولا ما غيكونش، واش غادي تكون ثقة ولا لا، الزبون غيجي عندك غياخذ المنتوج ديالك ولكن غيطرح عليك سؤال واحد هو يلا تسدو الحدود وأنا برا فالسعودية شنو غادي دير معايا، هنا انا ما نقدرش ندير معاه شي حاجة غنقول ليه را ما غندير معاك والو يعني ما بقاتش الثقة بينا وبين الزبائن، والسبب هو القرارات العشوائية ديال الحكومة”.
حصلة الكليان
وتطرق المير إلى موضوع آخر قرار اتخذته الحكومة بخصوص إغلاق الحدود، قائلا “فقرار الإغلاق المفاجئ الآخير زبائن ديالي كانوا على برا مشاو للسعودية، كملو المدة ديالهم بغاو يرجعو ولكن الحدود مغلقة، الأوطيلات كيقولو ليهم خاصكم تخلصو ولا نخرجكم على برا وأنا ما يمكنش نخلص عليهم، وحتى واحد فالسفارة ولا القنصلية ما هضر معاهم كلشي كيتهرب كلشي كيطفي التلفونات”.
وأضاف “الناس كاين اللي زاد 15 يوم وكاين اللي زاد 20يوم على حسابو خلصها تما صيفطولو عائلتو الفلوس،
وكاين ناس الي خدات طيارة على حسابها من جدة لمصر لتركيا ومن تركيا عاد دخلو للمغرب يعني الثقة انعدمت بين وكالات الأسفار والزبائن”.
وواصل المسير حديثه بالقول: “ملي خرج القرار البارح بالليل التلفون ما سكتش الناس كيسولو واش فعلا هاد القرار صحيح، وكاين ناس اللي حاصلين برا باغين يدخلو”.
ما بقيناش باغين الدعم!
وأكد المير في تصريح للموقع “الحمد لله بدينا كنديرو حجوزات، حنا دابا ما بقينا طالبين حتى حاجة، وما بغينا لا دعم لا والو، حاجة وحدة الحدود ما خاصهاش تبقى تسد بحالنا بحال جميع الناس، المرض ما بقاتش عندو خطورة، ودلتا كان خطير كثر منو فالصيف والجالية كلها جات وكانو الحالات طالعين”.
وشدد مسير وكالة أسفار على أنه “الحدود ما خاصهاش تبقى تسد، دير اللازم مع الناس بغيتي تسافر يكون عندك جواز التلقيح واختبار كورونا وفرَض الجرعة الثالثة…
وكنتمناو هاد الشي ما يبقاش يتكرر ويخليو الناس تخدم، وكنطلبو الله يرفع علينا هاد الوباء”.
