أحمد الحاضي
راس العام كل واحد وفين كيدوزو، شي مع الدار وشي كيتعشى برا، ولكن بعض وزراء البيجيدي اتفقوا باش يدوزو راس العام في الدار. “كيفاش” اتصلت ببعض الوزراء وها آش قالو.
لحسن حداد، وزير السياحة:
غادي ندوز راس العام في الدار قدام التلفزيون نتفرج شوية وصافي، زايدون أنا خدام اليوم حتى للستة في البرلمان وخدام غدا خاصني نقضي شي غرض. الحاصول ما كاين عطالة، كاين غير الخدمة ثم الخدمة.
محمد أوزين، وزير الشباب والرياضة:
باقي ما عرفتش في غادي نقضي راس العام، حيت بناتي هوما اللي غادي يقررو، لأنني ما كنشوفهمش بزاف، العام كامل وأنا نجري، داك الشي علاش كنعطيهم يعزلو في بغاو يقضيو راس العام والعطلة الصيفية. وفي الأغلب في الدار حيت بناتي صغار كيبغيو غير يحتفلو في الدار.
إدريس الأزمي، الوزير المنتدب لدى وزير الاقتصاد والمالية المكلف بالميزانية:
هذا سؤال مهيييييييييم (يضحك). ما عنديش مع راس العام وما كنحتفلش بيه، حيت هو يوم كسائر الأيام.
الحاج نبيل بنعبد الله، وزير الإسكان وسياسة المدينة:
غادي ندوز رأس السنة في داري وما كيهمنيش موضوع الاحتفالات برأس السنة.
