لاعب المنتخب أمين حارث.. الأسد المنحوس (صور وفيديو)

محمد المبارك

على عكس بعض اللاعبين في المنتخب المغربي، الذين لفتوا الأنظار في كأس العالم المقامة حاليا في روسيا، أمين حارث لفت الأنظار بعد البطولة لكن بشكل سلبي جدا. كيفاش؟

الطفولة والنشأة الكروية

أمين الحارث، المزداد في فرنسا سنة 1997، واحد من أحسن المواهب الكروية اللي كاينة في المغرب حاليا، بانت الموهبة ديالو فالطفولة مع فرق الأحياء، وبدا في مركز الترجي الباريسي ملي كانت عندو ستة سنوات، وفي السنة الموالية مشا لباريس سان جيرمان، ومن بعد ريد ستار، وفي النهاية غادي يستقر مع نادي نانت سنة 2012، وهو نفس النادي اللي قدمو للعالم.

الاحتراف والظهور بقوة

سنة 2016، أمين غادي يوقع عقد احترافي مع نادي نانت، وفي ظرف سنة فقط قدم مستوى كبر من السن ديالو، الشي اللي خلى فرق كبيرة تراقبو، منها بايرن ميونيخ وأولمبيك ليون، ولكن العرض اللي كان أكثر جدية هو عرض فريق شالكه الألماني اللي انتقل ليه أمين سنة 2017، واللي قدم فيه موسم أول جيد جدا، خلى فريق شالكه يعتبرو واحد من اللاعبين ديال مستقبل النادي.

مسيرة مع المنتخبات

بحكم أن أمين تزاد في فرنسا كانت عندو الجنسية الفرنسية ولعب مع المنتخبات الصغيرة للمنتخب الفرنسي، في جميع الفئات ديالها، وكان رفض يلعب مع المنتخب المغربي لأقل من 19 سنة، ولعب مع المنتخب الفرنسي لنفس الفئة العمرية وربح معاه كأس أوروبا.

فاش جا وقت الحسم والاختيار ديال المنتخب الكبير، حارث في آخر لحظة اختار المنتخب المغربي بواسطة فيديو على تويتر، وكان السبب هو التعلق ديالو بالمغرب، حيث كان كيجي كل عام مع والديه للدار البيضاء، وكذلك لأنه عارف بأن الحظوظ ديالو في المنتخب المغربي أكبر من الفرنسي.

الحياة الخاصة

حارث كان عندو مشكل في الانضباط، وكان كيسهر قبل المباراة بأيام واخا ممنوع عليه، وهاد الشي سبب ليه مشاكل مع ناديه الأول نانت، ولكن مع الفريق الألماني شالكة تغيرت العديد من الأمور، خاصة أن أمين ولى كيحس بالمسؤولية وكذلك الفريق كيعاملو معاملة خاصة

في 29 شهر يونيو الماضي، ومن بعد ما رجع من كأس العالم 2018، حارث غادي يطيح في موقف لا يحسد عليه، دار حادثة سير مميتة، مات فيها شاب عندو 28 سنة في مراكش، وخلقات مشاكل لحارث وشدو ليه الباسبور ديالو حتى يشوفو شنو غادي يديرو معاه.

وحتى الرأي العام المغربي انقسم لمتعاطف مع أمين، حيث قالوا باللي مازال دري صغير وعندو مستقبل قدامو، والضحية راه مات بغير عمد، يعني العائلات يتفاهمو بيناتهم، ووحدين آخرين قالو باللي خاص تنزل عليه عقوبات قاسية باش يكون عبرة

نادي شالكة الألماني تعاطف مع اللاعب ديالو، وصرح أحد ممثليه لجريدة “بليد” الألمانية باللي خاص يوقفو مع أمين، خاصة أن النفسية ديالو غادي تكون متأزمة، وياخذو بعين الاعتبار السن الصغير ديالو.