فالوقت اللي عدد من المغاربة فهموا مزيان الخطر اللي كاين، ورجعو كيديرو منشورات توعوية وكيطلبو من الناس يجلسو فديورهم، وصور ديال مغاربة محترمين المسافة بيناتهم قدام الفرمسيان، كيبانو شي مكلخين من الشيوخ وكيبداو يطلقوها تسرح، واخا هما ما بينهم وبين الطب والإجراءات الوقائية غير الخير والإحسان.
قرار إغلاق المساجد اللي صدراتو السلطات المغربية، اليوم الاثنين (16 مارس)، حفاظا على سلامة المواطنين، خلى المغاربة يعرفو الكلاخ ديال بعض الشيوخ، اللي بانو ما فاهمين والو، وما متبعين والو، وغير سامعين، وخدامين غير بجيب يا فم وقول، والهضرة عن جهل.
الشيخ التكفيري عبد الحميد أبو النعيم دار فيديو كيهضر فيه على هاد القرار، وكيقول باللي المساجد ما خاصهاش تسد، وحاول يحرك العاطفة ديال الناس، ودخل الملاهي والمراقص وقال علاش ما يستدوش.
الكلاخ ديال أبو النعيم عماه على الحقيقة، ولو كان بصاح متابع شنو واقع، كان غادي يعرف، باللي لبارح الأحد (15 مارس)، تعطى أمر بإغلاق الملاهي، واليوم الاثنين (16 مارس)، القرار داز حتى للمقاهي والمطاعم، حيث ببساطة الدولة خايفة على مواطنيها وماشي عندها تحامل على الدين، بل آخر قرار تخاذ هو إغلاق المساجد بحكم الاحترام والقدسية اللي عاطياها الدولة المغربية لدور العبادة.