تاق الشعب مشا لصندوق. عطاه مليون صوت، ومائة وسبعة مقعد في البرلمان، وتخالط عليه الحساب.
من الصندالة دار سباط، ومن الجلابة دار كوستيم، وحيد الطقية ودار كرافطة، قج راسو قبل ما يقجو الوقت.
عمو بنكيران ترجاو فيه الناس خير، سياسي وولد باب الله، نية وصادق وكيقول غير المعقول، تران بلا فران، يقول الحق في وقت الضيق. دخل للبرلمان ضرب دورة في الغرفة الأولى والثانية، بخر ولقا العفاريت والتماسيح، والناس اللي فيهم الفز قفزو وتغاوتو وتعراو… قلنا بنكيران خرج فيهم في النهار الكهار وراه غادي يدير لحل.
تسنا الشعب نهار مورا نهار… زاد في ليصانص، وقال الشعب الأزمة وقالت المعارضة الإضراب، وتزاد في البنان. قال الأزمة وتسلفات الحكومة مليون ومليار ماشي بالدرهم لحساب راه بدولار، وقال الشعب كل البلدان مأزمة ودرنا راسنا بين الروس وقلنا يا قطاع الروس.
زاد بنكيران وهزو ليه البندير، يحكي ويحكي ويطبلو ليه، وحتى حنا طبلنا ليه حيت قلنا راه غادي يكون منو الخير، ساعة كيفما كيقول المثل المغربي صحابتك كرمة وفيها الكرموس، ساعة أنت خربة وفيها الناموس.
شهر الأول شهر التاني ما كين خير.. العام الأول وحنا في التاني وما بان خير، ما تحاسبو العفاريت ما تسلخو التماسيح ما تزاد في الصالير، وكملها وجملها قال ليهم عفا الله. ما كال الشعب البنان، ما تصلح قضاء، ما تقاد إعلام، ما تزفتت الطرقان، ما قراو ولاد بوزبال، ما زيانت المرا، ما كين غير البيع والشرا في الكلام والشعارات والخُريف في مجلس النواب، والمعطل محيح قدام البرلمان، وإعلام كيطبل: عمو بنكيران باقي بالشعبية.
بلغة الشعبية راه والو والو ما بقا ليه والو. شعب من بعد ما ترجا الخير حط اللامبة مع الكتاب والميزان والحمامة والتراكتور والوردة، وقال الأحزاب كاملة بحال بحال: لا إسلامي لا ليبيرالي لا يساري لا معتدل لا اللي ما عندو لا دين لا ملة لا أصل يحشم عليه. واللي ما تاق يقرا تعاليق في المواقع وفايس بوك وتويتر، ويقلب على الشعبية.
قالو على هاد الكلام وغادي يقولو عفاريت وتماسيح، وقلنا وغادي نقولو اللي فاق راه فاق. شكرنا بنكيران في هاد العمود مرات ومرات، لكن بنكيران ما بغا يفيق ويعيق. سبع أيام ديال الباكور سالات، قداميتو ومن حقنا اليوم نقولو على بنكيران بحالو بحال السابيقين في التسيير، وخا راه إنسان صادق ولطيف وكيضحكنا ودمو خفيف، ولكن أمور الدولة خاصها قد الفم قد الدراع. وفينك يا الدراع؟
ومشات حكايتي مع الواد، حيت هزها فيضان قرنابي عمو بنكيران.
