قصة “زواج” جوج بنات في وجدة استأثرت بالاهتمام الأسبوع الماضي، في حدث ما سبقش للمغاربة شافوا بحالو حتى جات فاتي وهبة.
الظهور وقضية العرس
كان أول ظهور للفتاتين هبة وفاطمة الزهراء على مواقع التواصل الاجتماعي يوم الأربعاء الماضي (18 يوليوز)، فاش صديقات ديالهم فرشوهم ولاحو تصاور ديالهم وقالوا أن جوج بنات في وجدة تزوجو وداو العقد ولبسوا الخواتم.
في اليوم الموالي، خرجوا البنات بتصريحات كيقولو فيها بأن هداك كان مجرد عيد ميلاد، وأن ارتداء الخواتم وبعض القبل كان مجرد تحدي على أحد الكروبات الفايسبوكية، وأنهم مجرد صديقات حميمات ومولفين يضحكو مع بعضهم.
حقيقة العلاقة واعتداءات
في أقل من يوم، ناشطات فايسبوكيات حطو صور لـ”هبة وفاتي” أكثر جرأة، واللي منهم صور من داخل غرفة النوم، وفي وضعيات مخلة. هاد الناشطات أكدوا أنهم كيعرفو دوك البنات تمام المعرفة، وأنهم بصح على علاقة، وباللي فقط خوفا من القانون والمجتمع سترو هاد العلاقة.
وبعدما انتشر هاد الخبر، هبة، اللي كانت خدامة في مطعم، خرجات من العمل وبقات مخبية في دارهم، أما فاتي، واللي هي أكثر شجاعة، فخرجات من الدار كيف العادة، وتعرضت لاعتداء من طرف ثمانية أشخاص، هاد الشي اللي خلاها دير ما دارت صاحبتها وتجلس فالدار خايفة.
الإعلام والجمعيات والبوليس
من بعد، “هبة وفاتي” تلقاو اتصال من عند قناة ألمانية قالت ليهم أنها غادي تصور معهم. وهنا اعتقدوا أنهم يقدرو يعاونوهم. وكذلك كيحاولو يتواصلو مع جمعيات باش يعاونوهم، بينما خافوا يمشو عند البوليس ويصدقو محبوسين بشي تهمة.
