محمد محلا
القضية حامضة مع مول صفحات “سكوب مراكش”، السيد راكب راسو وما بغايش يتفاك، إذ أوضح، في حوار حصري مع موقع “كيفاش”، أنه “يلا تشد غادي تولي هضرة أخرى”، مشيرا إلى أن الذين يقفون وراء الصفحات هم “ولاد وبنات”.
المشرف على الصفحة، الذي لم يفصح عن هويته، كشف، في رد غريب، عن تخوفه لا ما يبقاوش أمهات الغد.
هاد الشي عجيب.
علاش كدير دوك الصور لشي بنات؟
آ خويا ما تنديرش التصاور لشي فتيات كيف ما قلتي، واش بنات الناس اللي داخلة سوق راسها ومربيينها واليديها غادي يهضر عليها شي واحد؟ بطبيعة الحال لا، حيت أصلا ما غاديش يشوفوها في الصفحة اللي هي مخصصة لبنات قليلات الأصل اللي خارجين رجليهم الشواري.
واش ما كتشوفش باللي شي دريات غير مظلومات وكيمشيو بذنب ارتكبوه دريات أخريات؟
حتى وحدة ما تنلوحها مظلومة، أنا ما كنحط شي وحدة حتى نتيقن من شي مصادر موثوقة.
منين كيجيوك المعطيات؟
هاد السؤال ما غاديش نجاوب عليه.
كيفاش تقرصنو ليك الصفحات لخرين اللي درتي؟
الصفحات تقرصنو وصافي، هادي ما غاديش نعطيك عليها تفاصيل.
واش ما خايفش البوليس يلقيو عليك القبض؟
يلا قبطونا البوليس وعرفونا ولاد وبنات، من هادي تولي هضرة أخرى.
آش بغيتي توصل من هاد الصفحات اللي كدير؟
الرسالة اللي بغيت نوصل للشعب عن طريق الصفحة هو باللي خاص لواليدين يحضيو بناتهم، راه هاد الشي كثر وولى كيخوف وولينا خايفين ما نلقاوش أمهات الغد.
