محمد المبارك
المس والسحر والعين كلها معتقدات كاينة عند جل المغاربة، واللي كيحاولو يتعالجو منها عن طريق الشعوذة أو الرقية الشرعية. ولأنه كاينين اللي كيخافو يديرو هاد الشي قدام الناس، بانت ظاهرة جديدة هي الرقية الشرعية عبر الفايس بوك ومواقع التواصل الاجتماعي.
الرقية بالفيديو للاستدراج…
سيدة قالت لموقع “كيفاش” باللي كانت كتحس بالتعب وبالنفور، وشكات باللي هاديك غي العين أو الحسد، فقررت دير الرقية الشرعية، ولكن بحكم العمل ديالها فضلت ديرها عبر الفايس فقط، واتصلت بواحد الراقي على الفايس.كتقول السيدة باللي اليوم الأول قال ليها باللي داك تلشي في سبيل الله، ومرحبا والخير في المساعدة، وبدات كدير معاه “أبيل فيديو” وكيقرا عليها بضع آيات. ومن بعد أسبوع تقريبا، قال ليها باللي حالتها صعيبة وعندها الحساد بزاف وهاد الشي خاصو حصص أطول وخاص ضروري من الخلاص، ب150 درهم للحصة.فاش وصلو عشر حصص، يعني 1500 درهظ، قالت ليه خاصني نصيفط ليك الفلوس، ولكن قال ليها لا، أنا ارتاحيت ليك وولفتك وبغيت نتلاقى معاك مباشرة ونتشاوفو!من بعد ما سيدة رفضت، لاح الأخلاق والقيم وبدا عليها بالسب والشتم، وفي النهاية اكتشفت أن هاد السيد داير هاد الشي فقط للممارسة الجنسية واستدراج النساء.
شعوذة وجن عاشق وتنويم…ديما على الفايس بوك، سيدة بدات كتحس بأعراض السحر، كيف كتقول، وتخلقو ليها مشاكل مع راجلها وبزاف ديال الأمور خلاتها تعتقد أنها مسحورة. دخلت للفايس بوك، ولأنها منقبة ولا تكلم الرجال، دخلات لصفحة راقية امراة. نفس الطريقة تقريبا، باستعمال تقنية “أبيل فيديو”، ولكن الثمن مرتفع شوية، 200 درهم، لأن هاد الشي خاص بالنساء.بداو أول حصة علاج، وبزوجهم دايرين “أبيل فيديو” ولابسين النقاب، بدات كتقرا عليها سورة الفاتحة شحال من مرة، وملي قالت شي طلاسيم خلاتها دوخ، ونعسات مدة فاش فاقت لقات الاتصال انتهى وراجلها حداها ودازت تقريبا شي 3 ساعات.اتصلت بها وقالت ليها راه الجن اللي فيك بدا كيهضر وأنت مسكونة بالجن العاشق، وطلبات منها المرة الجاية يكون راجلها معاها ولكن الراقية رفضت، فطلبات منها تحيد النقاب وكذلك رفضت وقالت ليها ديري تسجيل للفيديو باش نشوف شنو كيوقع ليا فقبلت.جات الحصة الثانية نفس الشيء، بدات كتقرا آيات من سورة البقرة وبطريقة متتابعة وعاودات داخت ونفس الشيء، فاش فاقت سولاتها على الفيديو ، قالت ليها باللي نسات ما دارتوش.!هنا دخلها الشك، وقالت ليها هاد الشي ما جانيش هو هداك، وألحت أن راجها يكون حاضر، ولكن الراقية عاوتاني رفضات، وكتقوليها راه نخاف على راجلك يخرج منك هاد الشي ويدخل فيه. قلبوها سبان ومعيار وفي الأخير اكتشفت أنها كانت مشعوذة تستمعل شي طلاسيم وشي كلمات غير مفهومة، أو كيف ما قالت ليها، التنويم المغناطيسي.
رقية وماء وزيت زيتون…سيدة تدعي أنها عولجت عن طريق الرقية الشرعية عبر الفايس بوك كتقول باللي كانت كدير حصص مع راقي، وكان كيرسل ليها الماء المرقى و الزيت المرقى، وكانت كيدير ليها الرقية بواسطة “أبيل فيديو”. ثمن الحصة كانت 100 درهم، لمدة شهرين، بمعدل 4 أيام في الأسبوع، زائد ثمن زيت الزيتون والماء، وحتى بعض الخلطات باستعمال الحبة السوداء، ومصاريف الشحن.
الظاهرة فرضت راسها فالفايس بوك، والناس، بحكم السهولة ديالها حيث الشخص غادي يبقى جالس غير فالدار و”يتعالج” بلا ما يسافر ومستور ، الأغلبية ولّى بغا يتعاطى ليها، ولذلك كثارو النصابة واللي بغاو يضحكو على الناس.عصام الخمالي، راقي معروف في مدينة مارتيل رغم صغر سنه. كيقول باللي “الرقية والعلاج يجب أن يكون مباشرة وذلك سببه أن الراقي يجب أن يعاين الحالة ويدير تشخيص للمرض لأنه يقدر يكون المريض عندو مرض عضوي ومحتاج للطبيب وماشي علاج بالرقية”.راقي آخر، وهو مراكشي يعيش في دبي، كيقول باللي “الرقية تعتمد فقط على النية من الطرفين وخاص غير الواحد يدير النية والحاجة مقضية، مباشرة أو باستعمال الفايس أو سكايب ولا حتى التالكي والكي المهم تكون النية صافية”.