والله يا الخوت، وما تسالوني حلوف، يلا السي سفيان خيرات، ديال الاتحاد الاشتراكي، جاب لي الشقيقة ملي شفتو فالتلفزة. الدري، اللي غابر على المغرب، بان بحال شي واحد لاعب ماتش ديال الكرة، والفينال كاع، وبغى يماركي على مصطفى الخلفي فالدقيقة الأولى باش يضمن الربحة.
المشكل ماشي فالواحد يبغي يبين راسو، ولكن راه لا بد من شوية ديال اللباقة فالهضرة. كاين الفرق بين سياسي كيبغي يقلي السم للعديان ديالو، زعما الخصوم، وبين واحد كيهضر بطريقة ما فيهاش الصواب بزاف.
على ما كنعرفو الاتحاديين عندهم الخبرة فهاد الشي ديال قليان السم، ولكن عندهم اللسان الحلو. حسن طارق مثلا، ولا المهدي مزواري، ولا عبد الحميد الجماهري، ولا إدريس لشكر براسو، كيوزنو كلامهم قبل ما يقولو شي حاجة، باش الناس ما يقولوش أعوذ بالله منهم، ولكن وصلنا حتى لسفيان خيرات وحلينا فمنا… وفوق من هاد الشي كامل الدري خاصو الميزاجور، حيت كيبان قدييييييم فالتحليل ديالو… يلا فتي ليه التجربة ديال التناوب تلف ليه كلشي.
تشاو تشاو.
