محمد المبارك
تزامنا مع مونديال روسيا والناس كاملة مركزة على النتائج ديال المنتخب، وشنو غادي يدير المنتخب في زوج مقابلات اللي بقاو، يوسف روسي، اللاعب الدولي السابق واللي خدام مدرب حاليا، خرج بتدوينة حملت اتهامات خطيرة لرئيس الجامعة الملكية المغربية لكرة القدم فوزي لقجع.
اتهامات خطيرة
مدافع الرجاء سابقا ماشي عطى انتقاد للمنتخب المغربي في كأس العالم، أو شي توجيه اللي غادي يدعم المنتخب فهاد المرحلة التاريخية، وإنما فتح ملف “خطير”، ووجه اتهامات إلى فوزي لقجع، رئيس الجامعة الملكية المغربية لكرة القدم، بـ”غسيل الأموال واختلاس وتهريب المال العام”.
روسي كتب تدوينة قال فيها: “انتهت مسرحية تنظيم كاس العالم 2026… ودابا خاصنا نطالبو بفتح تحقيق مع الرئيس ديال الجامعة الملكية المغربية لكرة القدم في غسيل الأموال اللي كيتم في الجامعة”، وهذا اتهام واضح للقجع والناس اللي كانت واقفة على ملف وطني اللي سماه روسي “مسرحية”.
وماشي غير ملف كأس العالم 2026، وإنما روسي كيقول باللي كاينين اختلاسات وعندو دلائل عليها، وبأنه تهدد بالقتل على قبلها، حيث كتب في التدوينة: “كذلك اختلاس وتهريب المال العام للأبناك السويسرية بصفتو مدير مكتب الميزانية في وزارة المالية والاقتصاد… ومع العلم أن عندي وثائق وأدلة اللي كتثبت كل هاد التلاعبات والاختلاسات وتهديد من طرفه هو وشركائه بالقتل إيلا تكلمت في هاد الموضوع”.
ورغم ادعائه باللي كاين خطر على حياتو، يوسف قرر يلعب دور البطل وكتب في نهاية التدوينة: “لكن جاء وقت المحاسبة لأي مفسد اللي قام بتبديد الأموال اللي الشعب ديالنا أولى بها”.
دعوى قضائية
من جهة أخرى، العديد من التقارير الإعلامية قالت باللي رئيس الجامعة فوزي لقجع غادي يرفع دعوى قضائية ضد يوسف روسي على خلفية هاد الاتهامات الخطيرة اللي وجهها ليه، واللي كتمس المصداقية ديالو زديال الجامعة وديال البلاد، في وقت حساس.
ورغم التفاعل الكبير مع التدوينة، لكن مجموعة من رواد مواقع التواصل طالبوا روسي يجيب الدلائل على الاتهامات ديالو.
