طارق باشلام
شهر ونصف تقريبا باش عايشين الموجة الرابعة من كورونا، وكاين اللي مازال بيناتنا كيقوليك الفيروس ما كاينش !
القضية ماشي ساهلة، وزارة الصحة كتقول حنا في المستوى الأحمر الأكثر خطورة، والمعروف بالعدوى شديدة الانتشار في جميع جهات المملكة، ماشي غير في المدن الكبرى، وكتنصح اللّي مازال ما كملوش جرعات اللقاح، يباليو قبل ما يفوت الفوت.
شنو واقع؟
توضيحات وزارة الصحة، جات في الخرجة الأخيرة للمنسق الوطني لعميات الطوارئ العامة معاذ لمرابط، الثلاثاء (05 يوليوز)، وتزامنت مع تسجيل 11 حالة وفاة غير في 24 ساعة.
ولاحظت الوزارة على لسان المنسق الوطني، باللّي تزادت بزاف الحالات الخطيرة والحرجة على أقسام العناية المركزة والإنعاش، وحتى معدل الوفيات في تصاعد وأكثرهم كيفوت عمرهم 60 سنة، لكن 95 في المائة منهم كانوا عندهم أمراض مزمنة وخا صغار في السنّ الله يرحمهم.
وغير في الستة أسابيع الأولى للموجة الحالية الرابعة ديال كورونا، أكثر من 420 مريض دخلو لأقسام العناية المركزة والإنعاش وهو رقم ماشي سهل.
كيفاش وعلاش؟
نسينا راسنا، مابقيناش كنديرو الاحتياطات اللي من بينها لكمامة، ونسينا اللقاح بالجرعة الأولى والثانية والثالثة المعززة، وبيناتنا ناس مسنين ومصابين بأمراض مزمنة، يلا تعاداو بكورونا احتمالية الوفاة ديالهم كتكون كبيرة، وخا الأعمار بيد الله.
وملي تحدثت وزارة الصحة على الجرعة الرابعة، ماشي لعب، لاحظت باللي كاينين اللي خداو الجرعة الثالثة ودازت عليها 6 أشهر ونقصت الفعالية ديالها، وكان خاص جرعة تذكيرية.
مانساوش باللي عيد الأضحى على بعد أيام، والالتزام بالإجراءات الوقائية في هاد الأيام غادي يعاون في تفادي ارتفاع الحالات.