ذنوب غيريتس!!

دابا خاص تكون عندنا الروح الرياضية ونقولو بصوت مرتفع: أخطأنا في حق المدرب الوطني السابق إيريك غيريتس، فبعد الهزيمة التاريخية التي سلطها الله سبحانه وتعالى علينا أمام تانزانيا بفضل المدرب المفدى الذي لا يشق له غبار، رشيد الطاوسي، ثبت، بما لا يدع مجالا للشك، أن إيريك غيريتس هو اللي خسر الصورة ديالو معانا ماشي حنا اللي خسرنا معاه.
بقينا كنغوتو راه البلجيكي ما مدرب ما والو، جيبو لينا مدرب وطني، وجيبو اللعابة ديال البطولة… ها الطاوسي ولد البلاد، ها ولاد البطولة كيلعبو… والنتيجة إيجابية جدا… لصالح تانزانيا طبعا!
دابا غادي نقولو الديفو فالجامعة! هي اللي بقات لينا. وشي صحافيين، اللي سكتو على الطاوسي من بعد الإقصاء من جنوب إفريقيا، غادي يبداو السيراج، وغادي يدوز الوقت ونبداو من الزيرو.
هاد الشي اللي عطا الله.. لا جامعة، لا مدرب، لا بطولة، لا جمهور (بعض المرات), لا صحافيين (بعض المرات)… منين نجيبو منتخب كيربح؟ من تانزانيا ولا إفريقيا الوسطى؟
بهدلتونا.. تشاو تشاو…