فالصفحات الفايسبوكية دايرين حملة ضد الطاكسيات الحمرين، اللي ما كيبغيوش يديو الناس لشي بلايص وما يهزوش كثر من كليان واحد.
الحملة بداتها صفحة” كازا بالفيزا” اللي كتنشر أي صورة ديال مواطن ما بغاش الطاكسي يهزو يديه للبلاصة فين باغي، ودارو هاشتاغ #دير_خدمتك_ولا سير_فحالك.
صفحات فايسبوكية تفاعلات مع هاد الحملة اللي بدات كتدير نفس البلان وتنشر تصاور ديال نوامر الطاكسيات اللي ما بغاوش يهزو الكليان.
موقع “كيفاش” سول مول طاكسي على هاد القضية اللي قال عليها بأن من حق الناس تشكى من الطريقة اللي خدامين بها شي مالين الطاكسيات، واللي خسرو السمعة ديال هاد المهنة.
وتابع: “المشكيل اللي يقدر يكون هو يلا مثلا المواطن صور نمرة ديال الطاكسي فالصباح وما حطها حتى لعشية يقدر يشريها للشيفور اللي غادي يشد العشية، وهاداك اللي دار الفعلة فالصباح يخرج منها هاني”.
