وجه الإعلامي رضوان الرمضاني، نداء إلى كل من الحكومة، برئاسة عزيز أخنوش، ورجال الأعمال، للتدخل في قضية الإرتفاع المهول الذي تعرفه أسعار المحروقات في المملكة.
وقال الرمضاني من خلال برنامج “العصابة”، في ندائه الموجه إلى حكومة عزيز أخنوش، “نتمنى من الحكومة بأنها ما تنتظرش من الدرويش بوحدو اللي يزير السمطة، نتمنى أن الحكومة طبّق على نفسها وعلى الإدارات العمومية والمؤسسات العمومية إجراءات تقشفية، يعني الإدارة العمومية وفي مقدمتها الحكومة تزير حتى هي السمطة”، مشيرا إلى أنها “عندها واحد النموذج باش تعطي الدليل على أن المكروه ملي كيصيب… كيصيب المغاربة كاملين ماشي غير الدرويش”.
وأضاف صاحب برنامج “بدون لغة خشب” في ندائه “آش فيها يلا الحكومة قررت أنها تزيّر الاستهلاك ديال المحروقات في سيارات المصلحة، وكنعرفو الإم روج، وشحال من إم روج فالمغرب، وعلاش كتحرك، وكيفاش كتحرك ولأي غرض كتحرك، وكنعرفو بونات الغازوال، 100 مليار سنتيم فالعام كيفاش كتصرف؟، وكاين اللي كيستافد منها واخا هو ماشي معني”.
وتابع “حشومة سياسيا وأخلاقيا فهاد المرحلة الإدارات العمومية كتمتع بالغازوال والمحروقات اللي كتخلص من جيب المغاربة، والمواطن المغربي نقولو ليه تفهمنا را السوق الدولي للمحروقات فارض علينا هاد الشي… كنتمنى الحكومة دير شي إجراء فهاد الباب”.
وفي ندائه لرجال الأعمال، قال الرمضاني “خديتو من البلاد ما يكفي، استثمرتو ما يكفي واستافدتو ما يكفي، ماشي مشكل عفى الله عما سلف، ولكن ملي كتكون الحزة خاصكم تبانو… كنتو رجال أعمال وعرفناكم رجال أعمال… دابا خاصكم تكونو رجال وتوقفو مع هاد البلاد اللي خيرها هو اللي دار ليكم الكتاف”.