علي حبابا، الشاب البالغ من العمر 19 سنة، واحد من الحالات الغريبة ديال الحريك فشهر شتنبر الجاري.
هاد الشاب كان قائد فريق أمل أولمبيك آسفي لكرة القدم، وفي بداية المرحلة الاستعدادية مع الفريق الأول توقفات المسيرة الكروية ديالو، لأسباب بينو وبين النادي. وبدون سابق إنذار خذا القرار ومشا مع الحراكة في الأسبوع الثاني من شهر شتنبر، والبارح الثلاثاء (25 شتنبر)، أكدت مصادر مقربة من علي، لموقع “كيفاش”، أنه كاين فإشبيلية الإسبانية.
هجرة علي حبابا دارت بزاف ديال ردود الفعل على مواقع التواصل الاجتماعي، وشي وحدين قالوا أن النادي تخلى عليه وأنها ردة فعل عادية بالنسبة لشاب تخلى على القراية من أجل كرة القدم، وحملوا المسؤولية الكاملة لإدارة النادي والمسيرين. وقال أحدهم: “الأندية تحلم لتشبيب الفرق ديالهم، وهادو كيجروا عليهم”. وقال آخر: “علي حبابا كان لاعب متألق وعندو مستقبل، ولكن دابا مشا للبلد اللي كتعرف بحق المواهب والكوارية”.
ومن جهة أخرى، كاين اللي كان ضد هاد القرار، وبالأخص لمراهق في السن ديالو، وقال أحدهم: “جرات عليه فرقة راه يقدر يمشي يدوز تيست في فرقة أخرى، واش كاينة غير أولمبيك آسفي في المغرب!!”.
وقال آخر: “دابا مشا حرك لإسبانيا واش معول زعما يلعب مع نادي كبير تما، راه صعيب يقبلوه يلا ما عندوش تكوين أوروبي، حدو الدرجة الثالثة واللي بحالها بحال البطولة الوطنية”.
